LUNES kadto ug kilumkilom na dihang mihinok si Enteng pagtago sa likod sa dakong punoan sa mangga nga nahimutang sa gamayng karsada padung sa menteryo.
Kahibawo ang bayungbayong kon kinsa ang tigdagkot og kandila ug tigdala og buwak niining mga orasa. Duna na poy nahuna-hunaan nga buhaton ang sapsing nga batan-on.
Gipugngan ni Enteng ang pag-agik-ik pagkakita niya nga nagpadulong na si Nang Esme sa iyang nahimutangan. Tuod man nagdala og lata sa gatas nga may sulod nga dalag nga mga chrystanthemum ang singkwenta anyos nga silingan ni Enteng ug nagbitbit pod kini og mga kandila. Kada Lunes gyud mobisita si Nang Esme sa lubnganan sa iyang bana kinsa namatay lima ka tuig na ang milabay.
Dihang nahitungod na gyud si Nang Esme sa punoan sa mangga diin nagtago si Enteng, miagulo og hinay ang badlungon nga bayungbayong. Gipugngan niya ang hapit na mogawas nga katawa dihang nakita niya nga mihunong ang biyuda ug mianinaw sa palibot.
Miagulo pag-usab si Enteng. Ug karon gikusog-kusogan na niya ang iyang tingog. Iya pang gitabunan iyang baba aron morag sa ilawom sa yuta nagagikan ang tingog.
Niining tungora milingin intawon ang mga mata ni Nang Esme nga nakapanglingi bisan asa aron masusi kon duna bay tawo duol sa iyang gihunongan. Wala ray usa ka segundo ang milabay human niya nabati ang pag-agulo nakadungog siya nga naay misampit sa iyang ngalan.
“Agoooooo...Eeeesssssmmeeeee, taaaaaabbaaaang...” maoy iyang nadunggan nga karon wala nay hunong sa pagbalik-balik pagtawag sa iyang ngalan ug nangayo sa iyang panabang.
Wa kahibawo si Esme nga puwerte na gyung pugong ni Enteng sa iyang bahakhak tungod sa nakitang kahadlok sa mga lihok sa iyang silingan.
Mituskig si Nang Esme sa iyang nahimutangan ug wa na makahibawo kon mopadayon pa ba sa pagbisita sa lubong sa iyang bana. Nangurog na iyang tuhod, namugnaw na iyang kalawasan, ug nanglimbawot iyang balhibo.
Nabuhian ni Nang Esme ang lata nga gisudlan sa gidala niyang mga chrysanthemum dihang mikalit lang og butho si Enteng gikan sa luyo sa punoan sa mangga nga nagasiyagit.
“Waaaaaaaahhh!!! Bwahahahahah!!!” siyagit ni Enteng dala ang panghadlok ug bahakhak kay wa na niya kapugngi ang kaugalingon.
“Susmaryosep! Amaw man diay kang bataa ka!” Mitig-ik si Nang Esme ug nahalayat sa iyang nahimutangan. “Atakehon man ta anang imong pagka sipat! Asus, asus, asus, madukol man gyud tika karon,” matod sa biyuda nga napulihan ang kahadlok sa kalagot.
Mi-aksyon na unta siya pagdukol kang Enteng dihang mikaratil og dagan ang gamayng ulitawo pahilayo nga wala mohunong pagbahakhak.
Bisan nagpangagot na ang ngipon sa kalagot, wala nay nahimo si Nang Esme gawas sa pagpadayon paglakaw padung sa menteryo aron makabisita sa lubnganan sa iyang bana ug madagkutan ang mga kandila ug makalitok pipila ka pulong sa pag-ampo.
Wala siya masayod nga didto sa unahan may nahitabo nga karma kang Enteng.
Dihang layo-layo na ang nadaganan ni Enteng, mihunong kini tungod sa dakong punoan sa kulo nga nahimutang duol sa ganghaan padung sa tugkaran ni Noy Teban.
Gahangos ang bayungbayong ug gasakit na ang tiyan sa sigeg bahakhak. Natuk-an siya sa iyang mga katawa dihang nakabati siya og katugnaw sa huyuhoy sa iyang tangkugo. Gisundan kini sa bugnaw nga paghilam sa iyang tuo nga bukton. Milingi si Enteng sa iyang tuo, apan wala siyay nakita nga tawo. Nangluspad si Enteng dihang ang iyang tangkugo na gyud ang gihilam sa bugnaw nga kamot. Mipiliik siya ug misutoy pagdagan padung sa ilang balay, daw iro nga mibahag ang ikog. (KATAPUSAN)