PIPILA ka mga tuig ang nakalabay, grabe ka daghan ang mga trabahanteng magbiseklita padung ug pauli sa trabahoan. Kadaghanan kanila nagdaginot sa kwarta samtang dunay pipila nga gigamit ang biseklita isip tipik sa ilang pag-ehersisyo.
Apan karon, tungod sa kabarato na lang sa downpayment sa mga motorsiklo, daghan ang namalhin. Ang kadaghanon sa mga nagbiseklita sa karsada di na grabe kadaghan itandi kaniadto. Mas nidaghan pa ang mga electric bicycle.
Hinuon, nagkadaghan ang mga mountain ug road bikers itandi sa nangaging katuigan. Usa sa mga timailhan niini mao ang nagkadaghang sellers sa mga gamit may labot sa biseklita. Buhi gud kaayo ang kan-anan sa kabukiran kon weekend o holiday.
Kaniadto, sa dihang aktibo pa ko sa akong bike-to-work, ang maglumbay sa pag-filter kadaghanan nagbiseklita. Apan karon, kasagaran mga scooter na ug motorsiklo. Kon lutsanay man sa trapiko, layo ra ang motorized two-wheeled nga sakyanan sa mga biseklita. Gawas nga ang gagmay nga mga biseklita maayo molusot, di usab kaayo ni offensive kon isubay sa mingaw nga mga sidewalk.
BENTAHA
Sagad sa akong agian kaniadto sa nagsige pa kog biseklita mao ang Pope John Paul II avenue. Di kaayo daghan ang mga sakyanan nga magsubay sa dapit kaniadto. Mas safer ni itandi sa ubang mga karsada bisan kon ngitngit ang ubang bahin.
Apan karon daghan na ang mga sakyanan. Dugangan pa sa hinay nga trabaho sa drainage system, hiinay ug naghuot ang mga sakyanan. Sama niadtong miaging Sabado, naglisod ko og lusot sa akong pag-uli tungod sa kadaghan sa mga sakyanan.
Aron makauli og dali, napugos ko pagsaka sa sidewalk nga maihap ra sab ang mga tawo nga nangagi. Ang akong bentaha, 29er ang akong gamit, ang lawom ug medyo bugdo kaayo nga mga gutter, gikaon lang sa dakong wheelset. Mas dali kong nakalusot kay sa mga nagmotorsiklo ug nag-scooter.
MOTOR O BISEKLITA?
Kon akoy pangutan-on asay mas maayo sa urban area, motor ba o biseklita, ari ko sa nauwahi. Mas ganahan ko sa biseklita tungod kay maka exercise ko. Mas dali sab nga ilusot sa nagsumpotsumpot nga mga sakyanan nga di ka mapanguyawan nga makasabod og mahalon nga four-wheeled nga sakyanan.
Kaniadto gani, sagad sa akong dad-on, mga folding bike nga gagmay. Malingaw na ko. Makadaginot pa ko sa akong pletihan.
Nausab lang ang akong routine human ko nipalit og scooter. Tungod sa nagkagrabeng kahimtang sa trapiko, gikinahanglan nga akong abagan ang akong asawa aron di ma-late sa trabaho. Imagine, hapit tagduha ka sa oras ang iyang biyahe while sa scooter, labing dugay 30 minutos.
Sa gihapon, kon ako lang, biseklita lang gihapon ang masaligan.