HUMAN sa kadaugan ni Mayor-elect Edgar Labella, di na ma-isolate ang Siyudad sa Sugbo gikan sa mga silingan niini. Nisaad si Labella nga mosalmot siya sa Metro Cebu Development Coordinating Board (MCDCB). Kini nga organisasyon gilangkuban sa local government units ug pribadong sektor.
Dinhi gituki ang mga plano ug imprastraktura.
Gitukod kini sa wa pa mahibalik sa City Hall si Mayor Tomas Osmeña. Dihang niasumer na siya, wa siya moapil. Nakamugna og kalisod sa organisasyon ang iyang baruganan kay naa baya sa sentro ang Cebu City kon Metro Cebu ang hisgutan.
Karon kay si Labella man ang midaug, di na sila maproblema. Hayan makairog na ang dagkong mga plano alang sa mga imprastraktura nga makasulbad sa suliran sa trapiko ug baha.
Ang usa sa gipahibawo usab ni Labella mao ang iyang pagpanangpit sa nasudnong kagamhanan alang sa pagpahigayon sa lapad nga dredging sa kasapaan ug mga kanal sa Dakbayan sa Sugbo. Dinhi makita nimo ang tinguha ni Labella nga makiglambigit sa ubang mga ahensya sa kagamhanan kay nasayod siya nga di gamay ang problema.
Sama sa trapiko, ang problema sa baha dako bisan tuod kon masinati lang kini panahon sa ting-uwan. Apan dako kaayo kini nga purhisyo sa publiko, di lang sa taga Dakbayan sa Sugbo.
Gawas tingali sa dredging, ipaestrikto usab sa pagpapatuman sa Siyudad ang balaud sa hustong paglabay sa basura. Niini, matod ni Labella, nagkinahanglan siya og partisipasyon sa mga barangay, kaalyado man o di.
Hinaut pa nga ning bag-ong umaabot nga mayor, mapadaplin na ang pamulitika sa usag usa kay gikinahanglan kaayo kini sa pagsulbad sa dagkong mga suliran sa dakbayan nga dugay nang napasagdan kay ang gipahari mao ang pamulitika nga dunay pagdumot, inay kahiusahan, pagkabahinbahin ang gisangkoan mao nga wa makairog ang siyudad.