SECTIONS
Monday, September 16, 2019
PAMPANGA

Garcia: Pamagyagyag (Persuasion)

Kapisik

“KAPAMILATAN ning kapibabatan ing talapanyakup malyari yang iyagyag, at ing malambut a dila asisira na la ring butul.”

~Diparan, Dangka 25: Sunis 15

“At e ta sana manikal gagawang kayapan,

Uling king makatud a panaun pumupul tamu, nung e ta tatabili.”

~ Galasyanu, Dangka 6: Sunis 9

“Inya sa’t balu tamu ing takut king Ginu, yayagyag ta la ring aliwa.

Dapot nung nanu tamu balu na ning Dyos,

at kanakung asaan balu na naman ning kekayung pilubluban.”

~Kadwang Aklat ding Kortintyanu, Dangka 5: Sunis 11

“Dapot karing kekayung pusu parangalan ya i Kristu ing Ginu anting nwan, parati kayung miyadya bang gawang pamanglwalu king ninu mang mangutang kekayu para king sangkan para king pagasang ati kekayu; makanyan man gawan iti king ganaka at pamigalang.”

~Mumunang Aklat nang Pedru, Dangka 3: Sunis 15

***

Lakwas yang mayap pakirandaman ing sisyak a ayup kesa king magbatingulngul a asu

Alang ninu man bisang ating gugulisak kaya kabang atin yang buring pagawa o yutus karing aliwa. Lakwas nang e mayap nung makabusaktung ya pa ing magyagyag. Alang bisang makirandam keng taung antita. Inya e ta mangasdan nung alang bisang makirandam at lalu na—mamintu kekatamu king buri ta’ng malyari nung e ta byasang makisabing mayap at banayad.

Ing taung makisabing mayap a banayad magsalita at makatiman dinan deng pansing deng kayang lalapitan at yayagyag king buri nang malyaring pamagbayu a manibatan king kayang dalumat o idea.

Ala kasing ninu man ing bisang tuturu nu la man kalati pangatau o kakalulwan o kelambelwan agya mang asne kabyasa ing magyagyag.

Atin ping makasulat keng Facebook napun a, “Ing tagumpe para ya karing mipakde king pamakisaman nung e karing tuturwanan ning lugud.”

I Mohan das Gandhi agyang e ya man mabandi, matas a pangatau at ala mang nanu mang upaya anting manungkulan king bangsa na kanita--ayagyag na la ring malda king kapagnasan nang taluki la king buri na bang misanmetung la para king pamagbayu king India kanitang mabye ya pa.

E ya itang anti kareng pulitiku ngeni a e la makapagsalit nung e la gugulisak at papakit kamwa at pamakisaman karing kasalang na.

Ayagyag na la ring kata-katang memalen Gandhi kapamilatan ning pepakit nang dalise kapagnasan at lugud bang lumaya ya ing kayang bangsa king e mayap a kapamalan ding menyakup a dayu king keyang bangsa.

Kulang ya pa pin ipan dapot neng misusulud yang parating mayumung timan at banayad a pamangamanu—mengari n’ya namang makapiblas mal a imalan agya mang ing susulud na ita mung susulud da ring sinakwil king bye makalabwad o awsan dang “sannyasi.”

I Ninoy, anting talatuki nang Gandhi king masampat a pamagyagyag anti ya naman kanita. Magsalita ya arapan da ring malda a parating makatiman at dusuldit magpapusung o mamiru inya sa’t e mu itang akakwa no pansing deng taung arapan na nung e pati pusu da adarakap na.

Ala kasing ninu man—o nung atin man mapilan la mu—ing bisang pagtasan siwala kabang yayagyag taluki king kaburyan ning ninu man.

Agyang pin deng bingut buri da banayad at malambut a pamagsalita ing makapapag-pamintu karela at aliwa ing pakit kang sikanan o kamwa karela o palmuran ta la.

O, kumyak la mu at mangaga nung antita ing gawan tamu karela.

E ta mangulisak at mangabural a mata nung e sibuknan tamu ing malambut a pamagyagyag at buluganan ta’pang mayumung timan ne, abe.

***

Dake Talabaldugan:

iswád¹ – (panguri) baliswag, twag, tikwas, baligtad. English: bottoms up or lower part protruding upward. Alimbawa king pamangamit: “Iswad ya ing bangka napun pa keng lele sapa uling palangyan de pa pintura keng kilub.”

It! o Iit! mu naman – (pambiglang panamdam) Kik! paswit, pasyuk neng magsalikutan. English: shrill signal when playing hide and seek. Alimbawa king pamangamit: “Ala yang patanat ing It! nang Beng anggang e la misalikut ngan deng kayang kakyalung keng salikutan king dane lalamkwyan.”

Ita¹ – (palagyu) Baluga, katutubung kule sakdal komanggi balat. English: Aeta, ethnic group called ‘Negrito’. Alimbawa king pamangamit: “Diritak na la mu reng Ita a manuknangan keng bunuk ning Pinatubu manibat inyang memakbung ya inyang 1991.”

itá¹ – (palagyu) uyta mu naman; amanu neng ating tutuldwan a makarayu. English: that, that one. Alimbawa king pamangamit: “Ala tamung akarapat uling ita ing makasulat keng tuntunan ning batas pambangsa.”

ití¹ – (palagyu) panuldu keng makalele o malapit. English: this or this one. Alimbawa king pamangamit: “Ala nang aliwa nung e iti namu ing makatagan a likwan nang pamanang Imang Neni—ing aklat nang Garalita.”

***

Gawing mekalingwan karing kapampangan!

Metung karing malagad namu nung e man mekalingwan nang pyalungang lubusan ya pin ing salikutan. Maralas keng paligid ning tanaman, lalam kwayan o lalam bale ing pyalung ayni dapot nung mumuran o mapali ken mu naming kilub bale.

Karing tubu Mawli “kik” ing gugulasyo da kabang magmula lang salikut king taya ding e taya atka aliwa naman “It” o “Iit!” at kabud dindam ya ita ala nang malyaring salikut pa. Ngeni ala nang mamyalung antini alus at mekalingwan namu naman.

***

Pamipalino: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph