Diola: Kalayo

Fr. Carmelo Diola

MOINGON sila nga “life begins at 40” kuno. Ako moingon nga “life begins at 60”. Ngano man? Sa pangedaron nga 60, nahatagan ko og usa ka parokya isip kura niini. Mao kini ang Archdiocesan Shrine of San Roque sa Barangay Mambaling. Giinstalar ako didto niadtong miaging Miyerkoles Agosto 14 sa pangilin ni San Maximiliano Kolbe, usa ka martir sa Simbahan.

Malipayon ako nga gipiyalan sa pagdumala sa usa ka parokya diin maabiabihon kaayo ug maampuon ang mga parokyano. May pang-adlaw-adlaw kini nga ginabuhat alang sa mga batang libod-suroy ug uban pang anaa sa suoksuok. Mapasalamaton kaayo ako sa mga kura nga nag-una kanako, kansang mga pagbudlay mipadangat sa kaanindot ug kaatibo sa maong parokya.

Puno sa kalayo sa gugma ni San Roque. Taga Francia siya. Adunahan ug gamhanan ang iyang kaliwat apan mipili sa kinabuhing yano ug kabos. Puno siya sa gugma ug kaluoy sa Dios nga maoy nagtukmod kaniya pagtabang sa mga biktima sa peste sa nagkalainlaing lungsod sa Yuropa. Didto sa Roma natakdan siya sa peste ug nangita na lang siyag lugar nga tago aron mamatay.

Gimilagrohan siya sa Dios pinaagi sa pagpadala og iro nga nagdala niya og pan ug maoy mitilap ug miayo sa samad sa iyang tiil. Mibalik siya sa iyang lugar nga natawhan apan wala mailhi sa mga tawo didto, naaan hinuon nga espiya. Namatay siya sa bilanggoan ug didto na lang nailhi kon kinsa gayod siya. Tawo siya nga misteryoso nga puno sa kalayo sa Dios.

Miingon si Jesus: “Mianhi ako aron pagpadilaab og kalayo sa kalibotan ug hinaot unta nga misilaob na kini!” Ang pagsangyaw sa maayong balita nga ang pagadangatan maoy ang pagkunsad sa Espiritu Santo maoy iyang gipasabot. Makapahinumdom ang maong larawan sa kalayo sa sampinit nga nagdilaab atubangan kang Moises nga wala maugdaw. Larawan kini sa gugma sa Dios nga makapabag-o sa tanan sa pamaagi nga dili makapaugdaw.

Ang pagdilaab nga gihisgotan ni Jesus mao ang iyang gugma sa tawo nga tinukmod sa iyang hingpit nga pagsunod sa kabubut-on sa Amahan.

Dili kalayo kondili lapok ang gidangat ni propeta Jeremias nga gipakanaog ngadto sa usa ka atabay. Buot sa pipila ka mga tawo nga patyon siya kay ang iyang gitagna kapildihan man sa Jerusalem nga nakigsangka sa armadong kusog sa mga Kaldeans. Nagdilaab si Jeremias sa kamatuoran sa Dios nga bisag gipalisodlisoran siya misulti lang gihapon siya sa kabubut-on sa Dios. Ang pagsilbe sa Dios dili man pagdaghanay og “likes”.

“Gialirongan kita sa dakong panganod sa mga saksi,” mabasa sa sulat ngadto sa mga Hebreo. Ang nagdilaab sa gugma sa Dios diri sa kalibotan gigantihan sa wayhunong kalipay didto sa langit. Sila ang nagmalahutayon taliwala sa pagpanglutos ug wala nila panumbalinga ang pag-antos sa ilang pagsunod sa Dios.

“O buhing kalayo sa gugma nga malumong nagsamad sa akong kalag sa kinauyokan!

Tungod kay karon dili ka madaugdaugon, Karon hurota!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph