ANG lawas sa 16-anyos nga lalaki, kinsa na-missing kaniadto pang Sabado, Agusto 17, 2019, ang napalgang nag-utaw-utaw sa kadagatan sa Cabahug Shipyard sa Barangay Opao, Dakbayan sa Mandaue, Dominggo, Agusto 18.
Nailhan ang biktima nga si Christian Joseph Lumapas, 16, molupyo sa Barangay Ibabao, Dakbayan sa Mandaue.
Nagkalat sa social media ang mga post sa kabanay ug kauban sa biktima nga naguol ug nangita kang Lumapas.
Matud ni Police Colonel Jonathan Abella, hepe sa Mandaue City Police Office, pasado alas 11 sa buntag nakadawat og tawag ang Opao Police Station labot sa patayng lawas nga naglutaw-lutaw sa dagat.
Dali nila kining girespondehan ug pinaagi sa coach niini sa football nga si Julius Tapia, nakumpirma nga ang lawas kang Lumapas.
Gi-review sa kapulisan ang mga kuha sa closed-circuit television (CCTV) camera sa Mactan-Mandaue Bridge ug didto nakita nga miambak kini sa taytayan alas 2 sa kaadlawon.
Nakita usab sa CCTV nga nagsakay ang biktima og habal-habal gikan matud pa sa Banilad Town Center diin minaog kini sa tiilan sa taytayan ug nagbaktas paingon sa tunga-tunga.
“Nakita namo sa CCTV nga nilayat mga alas 2 sa kaadlawon kay gipa-trace man nako. Nagsakay siyag habal-habal, nagpa-drop sa may bridge, unya nagbaktas paingun sa tunga-tunga. Pag after, nilayat,” matud ni Abella.
Dili pa nila matino kon unsay hinungdan sa pag-ambak sa biktima, hinungdan nga makig-alayon sila sa pamilya lakip na sa mga higala niini sa wala pa mahitabo ang insidente.