NAGKINAHANGLAN lang og usa ka round si ALA fighter “Prince” Albert Pagara sa pagrehistro og knockout nga kadaugan batok kang Thai Ratchanon Sawangsoda niadtong Sabado sa gabii sa main event sa Pinoy Pride 46 sa Ormoc Superdome sa Ormoc City.
Kaupat gitumba ni Pagara si Sawangsoda una miitsa og tuwalya ang iyang corner isip timailhan sa ilang pagsurender sa ika-2:54 minutos sa round.
Nagkanayon si ALA stable coach Edito Villamor nga nibalik na ang kanhi kabangis ni Pagara ug hapit na kining makapanuktok og balik alang sa world title.
Gipasabot ni Villamor nga kinahanglan na lang moaway og title eliminator si Pagara sa sunod niyang tahas aron mahimong usa mandatory challenger alang sa usa ka world title.
Si Pagara kasamtangang rated No.3 sa World Boxing Organization (WBO) super bantamweight division sunod sa mga kababayang sila si Marlon Tapales ug Juan Miguel Elorde.
Misaka ang rekord ni Pagara sa 32-1, 23KOs nga samtang si Sawangsoda natagak sa 12-4, 12KOs nga baraha.
Sa co-main event, ang stablemate ni Pagara nga si Jeo Santisima miposte sab og yanong kadaugan human niya gi-knockout sa 1st round si Indonesian Alvius Maufani.
Usa ka makusog nga right straight nga kumo ni Santisima ang nagpatumba kang Maufani sa ika-1:49 minutos sa round.
Si Santisima naghupot na og 18-2, 15KOs nga rekord samtang si Maufani nahagba sa 6-4-2, 3KOs nga baraha.
Sa undercard, ningdaog sila si Jonas Sultan batok kang Salatiel Amit (TKO 7), World Boxing Council (WBC) No. 2 ranked minimumweight Melvin Jerusalem batok Reymark Taday (TKO 7), Esneth Domingo batok Belmar Plaza (KO 1), Lorenz Ladrada batok Rimon Rama (MD), ug Jhon May Acope batok Anthony Desabille (MD). (EKA)