KARON nga milampos siya sa iyang tinguha nga hatagan ang San Miguel Beermen og kampiyunato sa Philippine Basketball Association (PBA) Commissioner’s Cup, gilab-as ni import Chris McCullough ang iyang kahinam nga mahimong sakop sa Gilas Pilipinas.
Nagpasabot kini nga andam si McCullough nga mahimong usa ka naturalized player alang sa Philippine national squad.
“I wanna play man,” matod ni McCullough sa interbyu sa ABS-CBN Sports.
Sa miaging semana, gipadayag nang daan ni McCullough ang iyang intensyon nga moduwa sa Gilas pinaagi sa iyang Twitter account.
Nagkanayon si McCullough, kinsa usa ka 1st round pick sa National Basketball Association (NBA), nga moduwa una siya og torneyo sa Korea una siya manimpalad nga makaduwa og balik sa NBA. (ESL)