ALCEA MANINGO
Cangyan, Carmen, Cebu
USA ka buntag nagdala si Jake og usa ka robot nga morag manikin nga lalake sa ilang balay. Gidiskarga niya gikan sa multicab nga lalag nga maoy serbis niya. Usa siya ka ‘interpreter’ sa husgado. Ug kining multicab iyang gidata-datahan sa iyang higala nga nipalit og bag-ong sakyanan. Gisugat siya ni Karen, iyang kapikas, ug sa ilang bugtong anak nga si Lloyd nga nagtungha sa national high school sa ilang lungsod.
“Unsaon man na nimong manikin?” ni Karen nga nagbarog sa pultahan sa ilang sala.
“Ako ning testingan. Gisugo ko sa huwes nga testingan una usa gamiton sa husgado,” ni Jake nga nagpahiyom samtang nagpas-an sa iyang dala. “Dili man ni ordinaryong manikin. Robot man ni.” Gipabarog niya ang robot sa sala, kilid sa sopa nga nag-atubang sa telebisyon.
“Unsa may gamit anang robota?” ni Lloyd nga mihikap sa nawong sa robot nga nagbarog nga morag ordinaryong manikin.
“Lie detector man ni nga pagka robot. Ang among huwes dili gustog testigo o abogado nga bakakon. Kastiguhon niya ang mamakak sa iyang ‘intercom’,” ni Jake.
“Unsaon man niya pagkastigo?” ni Karen nga miduol sab sa nahimutangan sa robot. Gihikap niya ang bukobuko ang bukobuko niini.
“Ang robot ray mokastigo. Managpa ning robot kon may makadungog nga naay namakak. Ang mosultig bakak maoy iyang sagpaon. Maong gipadala una sa huwes dinhi ang robot aron pasulayan nako kon mo-function bag ensakto,” ni Jake. Iyang gipindot ang swits para pagpaandar sa robot nga diha mahimutang sa belya sa bakos niini.
“Good morning everyone! I am Bert. the lie detector. I am at your service,” matod sa robot sa kasagarang tunada sa sinultihan sa robot.
“Sige, Dad, atong testingan,” ni Lloyd nga naghinamhinam.
“Gusto kang ikaw unahon nakog pangutana?” ni Jake.
“Sige,” ni Lloyd.
“Wa ka ba mag-cutting classes gahapon?” ni Jake.
“Wa!” ni Lloyd. Gisagpa dayon siya sa robot. “Ayay!” ni Lloyd. Gihikap niya ang iyang aping.
Naigking sa kakugang si Karen nga nagtan-aw. Gibati siyag kaluoy sa anak.
“Sulti sa tinuod!’ ni Jake.
“Nipalta bitaw ko sa katapusang subject,” ni Lloyd. Wa siya sagpaa sa robot.
“Ikaw bay nagkuha sa sensiyo sa bulsa sa akong karsones nga gihanger?” ni Jake.
“Dili!” ni Lloyd. Nasagpaan na sab siya sa robot. Naigking na pod si Karen.
“Tug-an sa tinuod!” ni Jake. “Ako bitaw, Dad,” ni Lloyd. Wa siya sagpaa sa robot.
“Nag-internet ka ba gahapon sama sa imong pananghid nako?” ni Jake.
“Oo, Dad,” ni Lloyd. Pak! Gisagpa siya sa robot. Naigking na sab si Karen.
“Sulti sa tinuod!” ni Jake. “Nitan-aw bitaw kog sine,” ni Lloyd. Wa molihok ang robot.
“Ayaw na ipasagpa sa robot si Lloyd. Di ba ka maluoy mabun-og na? Imo god nang anak!” ni Karen nga mibatig tumang kaluoy kang Lloyd nga katulo hisagpai sa robot.
Kalit gisagpa si Karen sa robot. Nahibulong si Jake nga mitutok og hugot sa iyang asawa. (KATAPUSAN)