AGGAGABUREN
nga agdadaluson dagiti linteg, ordinansa, executive orders ken etsetera ditan a pammilin ken annuroten... ngem apay a pagay-ayattayo met a tubngaren.
Ditay kadi kaamak ti linaon dagita a pagannurotan nangruna iti dagsen dagiti nailatang a pannusa? Wenno nasukirtayo a talaga?
Agasem... ammom langaruden nga iparit ti linteg ti kasta nga aramid, ngem apay nga aramidem pay laeng? Uray naming-anokan a nadusa gapu iti panaglabsing... apay nga aramidem pay laeng?
Tsk tsk... adda rigrigatna a batoken ken amirisin ti pudpudno a rason no apay a pagay-ayat ti tao ti tumubngar imbes a sumurot iti annuroten.
Ala...padasentayo a batoken ngem sakbay nga agtunglabtayo a malmes...intay pay taldiapan dagiti paspasamak itay kallabes:
Kapudotan a kontrobersiya ket ti takder ti pagilian nga amin a lugan-taaw nga agpanggep a sumagid iti teritoryo ti Pilipinas, masapul nga agpakada nga umuna.
Simmaruno ti takder a saan a mabalin a sumrek iti sakuptayo dagiti gangannaet nga armado. Nadagsen dagita a takder a nangibunga iti agsasallapid a panirigan.
Apay ngay kano a napalubosan met dagiti Tsino a nagdappat iti teritoryotayo idiay West Phil.
Sea nangruna dagiti luganda nga addaan armas? No bimmisita ti pang-gubat a barko ti Estados Unidos (SS Ronald Reagan) itay nabiit, daytoy ket paset ti tinawen a saritaan a napasingkedan isu a makuna a legal.
Saludsod: numan pay saan pay a nakumpirma ti AFP nga adda kano dagiti survey ships ti China ti nasaripatpatanda....adda manen simmaruno a report nga adda kano dagiti barko-de-giyera ti China ti immasibay sadiay Mindanao itay nabiit.
Ania ti kaipapananna? Saanda a nagpakada. Tagibassitenda ngata ti kabaelan ti Pilipinas iti isyu ti depensa wenno mangsutsutilda laeng.
Ti kadagsenan a pangngarig dita ket no ti inaramidda ket kasla mangkarkaritdan iti mas nadagdagsen nga eksena. Sabagay, ita a bulan, agpa-Tsina ni Pres.
Duterte. Bareng ta mapagsaritaanda dagita a pasken.
Nagsasaruno dagiti imbestigasyon sadiay Senado. Nagsentroda iti isyu ti korapsiyon manipud PCSO agingga iti naireport a Mafia kano iti uneg ti Philhealth.
No panggep iti PCSO...adda pay kano dagiti nairaman ti naganda kadagiti rumbeng a maimbestigaran gapu iti alegasyon a korapsiyon.
Adda ngarud damag a kumitkita kano dagiti “games” ti PCSO iti saan a bumaba iti P400 milyones iti inaldaw. Ngem ti mairemremit kano ket mapan laeng iti P30–P40Milyones.
Pappapanan ngarud ti dakdakkel a kantidad? Kunada, masapul a sungbatan dagiti franchise holders ti nakuna a saludsod.
Dayta ti makagapu no apay a napasardeng ti operasyon ti PCSO nupay nakasublin ti Lotto ngem awan pay ti STL, ken dadduma a PCSO games.
Malagiptayo manen ti umadanin a pannakaiyusuat ti Universal Health Care... a ti pondo daytoy para iti sangapagilian ket agtaud iti nadumaduma nga ahensiya ti gobyerno...maysa ditan ti PCSO ken PAGCOR. Masapul ngarud a mairingpasen dagiti imbestigasyonda tapno awanton ti sumingit a parikut.
Pimmutok ti isyu sadiay senate hearing nga adda kano Mafia iti uneg ti Philhealth. Naiparang dita dagiti maatap kano a personahe nga adda iti likudan iti naibulgar a Mafia.
Amin dagiti maatap ket manipud iti nadumaduma a rehiyonal nga opisina ti Philhealth iti depaar ti lumaud... (saan a Luzon). Pinaglibkan met dagiti nasuspetsa ti report ken pammabasol. Saan pay a nalpas ti imbestigasyon iti nakuna a parikut.
Kinagiddan manen ti ipuputok ti maysa manen a kontrobersiya: adda kano dua a kameng ti gabinete ni President Duterte ti maisaang iti imbestigasyon ti PACC (Presidential Anti-Corruption Commission) iti panangidaulo ni Commissioner Greco Belgica.
Ti bangsitna, saan a nainaganan no siasino dagitoy. No sibibiag la koma daydi lolok...maymaysa ti pangeddengna: “inagananyon dagita a buwaya tapno maammuan no pudno wenno saan ti alegasyon wenno pammabasol.” Straight guy ngamin ni lolok, pards.
Ti kayatna, awan ti maidulin wenno mailemmeng. Ti laeng bangsitna, lolong... no ngay naisipsip laeng dagita nga awan met kinapudnona ti pammabasol... ket maibulgar ti nagnaganda... pimanto met ti reputasyonda, saan aya? Ngem apay ngarud a dagiti matitiliw a suspects (dipay napaneknekan ti nagbasolanda) ket mainagnagananen ken maiparparangen iti media? Nagulimeken ni lolok, pards. Makatabtabbaawen, sika. Sapay no makaunget ket bumalsig.
Napintas a damag: indeklara ni President Duterte ti Nobyembre 17 a kas National Student’s Day babaen iti Repbulic Act 11369.
Ramen iti linteg a ti National Youth Commission ti agsirbi a kas lead agency para iti tinawen a selebrasyon.
Daytoy a gannuat ket kas panangbigbig iti akmen dagiti estudyante iti pannakaisa ti demokrasya ditoy pagilian.
Kunada ngarud: “nasa kabataan ang pag-asa ng bayan”. Ngem iti sabali a benneg...nasakit man a maammuan...adda rimmuar a reports manipud DILG nga adda kano dagiti pagadalan ti masuspetsa nga agre-recruit kadagiti agad-adal tapno maikameng iti NPA.
Adda dagiti nainaganan a pagadalan ngem sinaruno met ti depensa ken panaglibak. Ti simmaruno nga eksena ket ti iruruar ti maysa a sigud a kameng ti NPA a simmuko ti nangkumpirma nga adda mapaspasamak a recruitment iti uneg mismo dagiti sumagmamano a pagadalan ditoy pagilian.
Agtawen pay laeng kano ni Agnes Reano iti trese (13) idi marecruit daytoy ti Alliance of Students Against Tuition Fee Increase sadiay Ateneo de Naga University.
Trabahona kano ti agiballasiw iti armas manipud Naga City nga agpa-Legaspi agingga idi naarmasanen daytoy a kimmappon iti NPA. Addan iti ikut ti AFP dagiti adu pay nga imbutaktak ni Reano.
Intayon bueltaen ti tema panggep iti no apay a pagay-ayattayo ti aglabsing iti paglintegan iti likud nga ammotayo ti dagsen dagiti nailatang a pannusa.
Iti laengen isyu ti illegal a droga. Ammotayo amin no ania ti dakes a maited ti droga....adu ti madadael a pamilya agraman masakabayanda.
Ammotayo a ramut daytoy dagiti krimen ngem adu met latta dagiti di agamak a sumrek iti illegaledad a katembeng ti pagayatan dagiti sindikato.
Adun dagiti naipatli, natiliw ken nabalud ngem apay nga adu latta dagiti maap-apput kadagiti inaldaw a misyon dagiti otoridad.
Dida ngata kabuteng ti linteg wenno pagay-ayatda a kariten ti ngipen ti otoridad? Iti met isyu ti korapsiyon... adun dagiti sinibak ni Digong. Adun dagiti nadusa ken maim-imbestigaan. Ngem adu met latta dagiti saan a mamki ken saan nga agamak iti dagsen ti dusa no maapputda.
Sukirtayo ngata ken ditay ipirpirit dagiti paglintegan gapu iti kidday ti pirak ken kinabaknang? Wenno naparmeknatayon ni Sairo ket immadayotayon iti saklolo ni Apo Dios? Saan pay a nagabay ti amin.
Adda dita ti nailatang a nalinteg a dana nga intay taluntonen. Dipay naudi ti amin tapno intay abrasaen ti pannakaisalakan iti basol ken pannusa. Amen. Adios mi amor, ciao, mabalos.