MOABOT ngadto sa 325 ka mga lolo ug lola sa dakbayan sa Sugbo ang nahatagan og libreng serbisyo pinaagi sa Senior Citizen Health and Wellness program kagahapon, Dominggo, Agusto 18.
Lakip sa mga serbisyo nga gitanyag sa buhatan ni Konsehal Niña Mabatid inabagan ni Mayor Edgardo Labella mao ang libreng ear check-up, eye check-up, blood pressure, sugar test, dental check up ug tooth extraction.
Ang mga adunay daot sa panungog hatagan og hearing aid samtang ang adunay deperensiya sa panan-aw hatagan og eye glasses ug kon kinahangkan ang cataract operation serbisyohan usab sila nga libre.
Ang maong serbisyo nga gipasiugdahan ni Mabatid sanglit apil kini sa iyang camapign promise sa niaging piniliay nga iyang tabangan nga mahimsog ang mga lolo ug lola.
Lakip sa mga naserbisyohan mao si Roberto Delos Sientos taga barangay Capitol site kinsa nagmulo sa iyang dunggan nga adunay magsiyok sulod na sa unom ka buwan.
Sila si Nanay Degrang Raymonda, 89, taga Barangay Mabolo; Poning Jayme ug Elizabeth Calago, kinsanagpuyo sa Barangay Lusaran, nagpahiling sa ilang mga mata ug tagaan sila og antiyuhos sunod semana.
Ang mga benepisyaryo nagpasalamat kang Mabatid ug kang Labella gumikan sa libreng serbisyo nga ilang nadawat.
Si Connie Madarang, Administrative Officer 4 sa buhatan ni Mabatid, nagkanayon nga adunay samang libreng serbisyo karong Agusto 25 didto gihapon sa Pinoy Care Visa Center sa 5th floor sa CFI building sa Capitol compound.
Usa sa kawsa ni Mabatid mao ang pagtabang sa senior citizens, nga nahimong dakong kabahin sa paglambo sa atong dapit karon, diin mahatagan sa ilang kalipay sa nahabiling katuigan sa pagpakabuhi. Kini ug daghang pang uban ang giplano niya alang sa komunidad. (PAC)