DUHA ka mga satellite office sa Land Transportation Office (LTO) 7 ang nakabaton na og laser engraver kon printer para sa plastic nga driver’s license.
Kini mao ang satellite office nga nahimutang sa Robinson’s Fuente ug sa SM City Cebu sa North reclamation area.
Si Regional Director Victor Caindec sa LTO 7 nagkanayon nga ang private proponent sa Driver Licenses Renewal Office (DLRO) maoy nagpalit sa printer balor og P2.3 milyones matag usa para mapaspapasan ang serbisyo sa pag-imprinta sa plastic nga lesinsiya.
Gidugang ni Caindec nga prayoridad sa iyang opisina mao ang pagtapos sa backlog sa printing sa plastic driver’s license sa dili pa matapos ang tuig 2019.
Ang E-Patrol sab sa LTO-7 nga maoy mosuroynsa mga LGU sa Cebu ug sa region 7 nakabaton na usab og printer.
Ang pangulo sa LTO 7 nagkanayon nagkanayon nga kadtong mga driver nga mag-renew sa ilang mga lisensiya ug kadtong maglukat pa, sigurado nga aduna na silay plastic sa higayon nga moadto sila sa Robinson’s Fuente ug SM City Cebu nga satellite offices sa LTO.
Ang satellite offices sa Robinson ug SM City Cebu sulod sa dugay nang panahon wala silay printer ug kadtong mga magkuha og lisensiya kaniadto, ang ilang madala mao ang papel ug moadto pa sila og laing buhatan sa LTO sama didto sa SM Seaside City para magpa-imprinta sa ilang plastic driver’s license apan karon direkta na nilang makuha gumikan sa pag-abot sa laser engraver kon printer.
Gilauman nga mas mapaspas ug hingpit nang mawala ang backlog sa pagpang-isyu og driver's license ug ubang dokumento gikan sa LTO 7. (PAC)