SUPERBALITA CEBU

TNVS, LTFRB mohimo'g dugang konsultasyon

GITAN-AW karon sa Land Transportation Franchising and Regulatory Board sa Central Visayas ang pagpahigayon og survey o ikaduhang hugna sa consultative meeting sa sektor sa transportasyon kon angayan ba magdugang og 1,500 ka slots sa transport network vehicle service (TNVS) sa Sugbo.

Gibutyag ni LTFRB 7 Director Eduardo Montealto Jr. nga sa consultative meeting niadtong Huwebes, Agusto 15, kasagaran sa mga nanambong kay uyon nga magpuno og 1,500 ka slots sa TNVS nga maisyuhan og provisional authority.

“Ako pa na i-design unsaon namo og survey. Mas maayo gyud na kumpleto. Hulaton pa namo ang among additional nga buhaton, mag-survey ba mi o mag-conduct mi og second round nga consultative meeting kay basin napay gusto mopadayag,” sigon sa director sa Superbalita Cebu niadtong Dominggo, Agusto 18, 2019.

Ang ride-hailing service, Grab Philippines, ang nihangyo sa LTFRB nga mag-abli og dugang 1,500 ka slots sa TNVS aron mapugngan ang nagsaka nga booking costs.

Apan giklaro ni Montealto nga kon magbukas sila og dugang 1,500 ka slots sa TNVS, dili lang kini alang sa Grab kondili mahimo usab mo-apply ang ubang transportation network companies (TNC).

Siya nipasabot nga kinahanglan nila balansehon ug dili lang kay automatic nga aprobahan nila.

“Tan-awon pud nato ang atong mga karsada. Basin ang atong programa nga to ease decongestion, makapuno na hinuon na sila. Kay basin ma-encourage na pud ning uban nga mopalit na lang hinuon kay naa may ipuno,” pamulong niini.

Sumala ni Montealto dinhi sa Central Visayas, dunay upat ka TNC: ang Grab, U-Hop, Hype ug Hirna.

Sa kasamtangan, dunay 1,230 ka TNVS nga nahatagan og provisional authority sa LTFRB 7.

Sa kinatibuk-an, 1,500 ka slots ang giablihan sa buhatan diin ang uban nag-comply pa sa gikinahanglan nga rekisitos.

Dihang naghiusa ang Grab ug Uber niadtong 2018, niabot og 3,000 ang TNVS dinhi sa Sugbo pa lang.

“1,500 lang atong slots nga open. So, nangita sila og paagi, katong mga active, taastaas og oras nga mag-serve, mao toy ilang gi-priority,” asoy ni Montealto.

Dugang niya nga duna pud silay gitangtang nga 200 ka TNVS niadtong Abril tungod kay kaduha wa motambong sa husay nga ilang gipatawag.

“Among gi-advisan ang Grab nga tanggala na sa inyong system, ilisi ninyo og lain. Sayang pud ang slots nga dili nato ma-fillupan,” dugang pamahayag sa director.

Ang DOTr nihatag og direktiba niadtong Agusto 14 sa LTFRB sa pagpatuman sa Anti-Red Tape Authority (ARTA) sa pag-aprobar sa TNVS applications. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph