Fuel cards gihunong

NIHUNONG na ang Land Transportation Franchising and Regulatory Board sa Central Visayas sa pag-apud-apod sa Pantawid Pasada Program (PPP) cards nga nadawat niadtong 2018 ngadto sa mga operator og public utility jeepneys (PUJ).

Sigon ni LTFRB 7 Director Eduardo Montealto Jr. wala na sila nag-isyu og fuel subsidy cards sugod niadtong Agusto 1, 2019, nga gihatag nga lugway sa ilang buhatan aron makuha sa operators og PUJ.

Sumala niini wala pa mohatag og abiso ang ilang ulohang buhatan ug Department of Transportation kon mohatag og laing lugway sa distribusyon sa cards.

Sa kapin 10,500 ka cards nga nadawat sa LTFRB 7 sukad niadtong Agusto 2018, ang direktor nibanabana nga 60 porsyento niini ang na-claim na sa mga PUJ operator.

Giangkon ni Montealto nga gibuhat na nila ang mga pamaagi aron kuhaon sa mga operator ang ilang PPP cards, apan ang uban niini wa gihapon mokuha.

Apil sa pamaagi nga gihimo sa LTFRB 7 ang wala na pag-renew sa mga prangkisa sa PUJ ug dili isyuhan ang operator og taripa alang sa bag-ong minimum nga pletihan gikan sa P6.50 ngadto sa P8 sugod niadtong Mayo.

Nitugot usab ang buhatan nga makuha sa mga operator nga tua na abroad ang mga card pinaagi sa ilang special power of attorney.

“Pero bisan unsaon na lang gyud namo among paagi, ang uban di gyud mokuha,” pahayag ni Montealto dihang nahinabi sa Superbalita Cebu niadtong Dominggo, Agusto 18, 2019.

Usa sa iyang nakit-an nga rason nganong dunay wala pa makuha nga cards tungod kay ang orihinal nga tag-iya pa sa PUJ units ang nakapangan sa fuel subsidy cards apan gibaligya na sa laing tawo.

“So, strategihan nato og usab unsay maayo nga strategy kay kasagaran man gud kaning dili na pangalan nila, gibaligya na nila ilang units. Atong hatagan kato raman mismo ang owner kay no sale and transfer man. So, dili na ma-claim,” siya niingon.

Usa ni sa gitun-an sa ilang ulohang buhatan ug DoTr kon unsa pay maayo nga buhaton.

Lain niyang gitan-aw ang ubang operators gipalabi nga di na kuhaon ang cards aron malikayan ang lalis tali sa mga drayber.

“Kay awayon man sila sa ilang drivers. Kay ang driver moingon man kami ang dapat makadawat ana. Pero ang drivers man pud gud kay come and go. So, dili gyud nato pwede ipangalan sa drivers kay wa man ta kahibawo kinsa mo-drive aning higayona, ani nga specific unit, specific nga PUJ,” nagkanayon si Montealto.

Matag card, dunay sud nga P5,000 fuel subsidy nga nagtinguha maabagan ang operators sa epekto sa excise tax nga gipahamtang sa presyo sa mga produkto sa petrulyo ubos sa Tax Reform for Acceleration and Inclusion (Train) Law.

Sa 2019, unang gi-report nga P20,514 fuel subsidy ang madawat sa mga operator. Ang makadawat niini kay kadto lang mga operator nga nakakuha na sa ilang cards.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph