SI ZAMBOANGA Tenpin Bowling Association (Zatenba) pintoppler Ruben Legorio misaka gikan sa ikawalong puwesto sa eliminasyon aron maangkon ang 14th Datba Kadayawan NBT Open title sa SM Lanang Premier Bowling Center ning bag-o lang.
Si Legorio, mipildi sa twice-to-beat No. 1 Arthur John Galendez (28) sa Davao Tenpin Bowlers Association (Datba), 206-164, 205-189, aron mabulsa ang 60,000 pesos nga champion's prize.
Ang Chavacano ace mipatumba og 229 pinfalls sa second shootout ug gipukan sila No. 4 Rico Licarte (228) sa Bowling Association of Las Piñas, No. 3 Dodong Dante (207) sa Seaside Tenpin Bowling Association, Incorporated ug No. 2 Levi Descallar (227) sa Datba aron maplastar ang titular showdown tali Galendez.
Sa first shootout, Si No. 8 Legorio (228) mipildi sab nila No. 5 Nierra (202) sa Datba, No. 7 Kert Palces (169) sa Datba ug No. 6 Wilma Catalan (160) sa Alabang Tenpin Bowling Association (Atba).
Si Galendez mibitbit og 30,000 pesos samtang ang ubang runners-up midawat og cash prizes atol sa awarding rites nga gitambungan ni Philippine Sports Commission (PSC) Commissioner Charles Raymond A. Maxey.
Si Dante, mipauli sab og 40,000 pesos human nanguna sa seniors masters event kontra Legorio nga nagpahimulos sa runner-up prize nga 20,000 pesos ug Descallar nga mipupo og 10,000 pesos alang sa third placer prize.
Ang seniors singles top three placers mao sila Licarte, Descallar ug Legorio, samtang si Abraham Saddoy nanguna kontra Galendez ug Dodong Dionio sa singles event.