Gym instructor; 2 higala nasikpaw sa buy bust

DIGOS CITY -- Nalit-ag sa hiniusang pwersa sa kapolisan ang usa ka gym instructor ug duha ka kauban niini pinaagi sa buy-bust operation pasado alas 12:40 sa kaadlawon niadtong Sabado, Agosto 17.

Giila ang dinakpan nga si Elnor Paraiso Magali, alyas "Dodong", 27-anyos nga ulitawo kinsamolupyo sa Purok Islam, dalang Lopez Jaena sa Barangay Zone 1.

Ang ikaduhang suspek nailhan nga mao si Christian Roy Daug-Daug, alyas "Roy", nga nagpuyo sa Purok Gemelina, Barangay San Jose sa dakbayan.

Ang laing suspek nailhan nga mao si Amerodin Mangandong Imam.

Nag-alayon ang pwersa sa Digos City Police Office ug Provincial Drug Enforcement of Davao Sur (PDEA) sa pagpanguna ni IA III Meldred Driz-Romero sa maong operasyon didto sa Purok Anahaw, Mabini Extension, Barangay San Miguel.

Sumala sa PDEA, nakuha sa posisyon ni Magale ang duha ka pakete sa gituohang shabu, 2,000 pesos nga marked money, ug usa ka Cherry mobile cellular phone nga hayan gamit sa transaksyon.

Nakuha sab sa posisyon ni Imam ang duha ka gituohang pakete sa gituohang shabu, cellphone, mga drug paraphernalia ug ang gisakyang kolor pula nga Honda wave nga nagbaton sa plakang LA51278.

Samtang, si Daug-Daug nakuhaan og mga drug paraphernalia lamang lakip ang ang usa ka condom.

Gibutyag sa mga awtoridad nga motimbang sa .04 gramo ang nakuhang druga diin aduna'y street market value nga 4,000 pesos.

Ang mga suspek mag atubang og kasong aduna'y kalapasan sa Repulic Act 9165 o gipalig-ong balaod sa pagbatok sa ilegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph