NAPATAY sa kapulisan sa Tugbok Police Station human misukol ang usa ka kanhi miyembro sa Pulang Bagani Command (PBC) 1 sa New People's Army (NPA) dihang gisilbi ang warrant of arrest niadtong Dominggo sa buntag sa Davao City.
Ang insidente nahitabo didto sa Block 35, Rosalina III, Barangay Baliok, Tugbok District.
Giila ni Tugbok Police Station commander, Police Major Ricky Obenza ang suspek nga si Benjie Martos “LongLong” Clarion, alyas JB, hamtong ang pangedaron nga lumad taga Sitio Battalion, Barangay New Carmen.
Sumala ni Obenza nga giunhan og pusil ang tropa sa kapulisan sa Tugbok dihang arestuhon na ang suspek sa kaso niini nga pagpatay.
Ang suspek gitumbok nga most Wanted kinsa maoy gitudlo nga mipatay kang Police Sergeant kon PSgt. Wilfredo Bansag Garol Jr. niadtong Nobyembre 13, 2017 didto sa Sitio Luman, Barangay New Valencia,Tugbok District, ning siyudad.
Nasayran sab nga sa milabay nga Pebrero 28, 2019 nadakpan sa checkpoint sa Task Force-Davao sa Bunawan District ang ig-agaw sa napatay nga si Along Clarion kinsa akusado sab sa pagpatay kang PSgt. Garol Jr.
Sa paghiling sa Scene of the Crime Operations (SOCO) narekober sa posisyon sa napatay ang usa ka KG9 .38 revolver, granada ug gituohang drogas.
Giingon sa Tugbok Philipine National Police nga di sila magpanuko nga mo-niyutralisa sa mga suspek labi na kung mabutang na sa alanganin ang ilang kinabuhi.
Ang patay nga lawas sa suspek anaa sa usa ka lokal nga punerarya sa Toril ning siyudad.