NASA alarming level na sa Cagayan de Oro ilabi na kalabot sa nagkataas nga ihap sa kaso sa dengue sa siyudad.
Nasayran nga gimugna na niadtong nilabay nga adlaw ang Oro Task Force kontra dengue. Gitakdang ipahigayon usab ang Citywide Cleanup Day karong Agusto 20 sa Oplan Kontra Dengue sa nagkadaiyang dapit sa siyudad.
Sa impormasiyon, anaa na sa 1,700 ka kaso sa nataptan og dengue sa siyudad ug 15 na ang natalang patay.
Gibutyag ni Konsehal Malou Gaane, tsirman sa komitiba sa panglawas, nga gideklara na nga epidemic ang siyudad.
"Gi-declare sa national ang epidemic especially dinhi sa Cagayan de Oro. Considered na ta as epidemic with 1,700 reported cases and 15 deaths," matud ni Gaane.
Gipasabot niini nga wala kini gipili nga si bisan kinsa ang posibleng mataptan niini hinungdan nga kinahanglan nga manglimpyo ang tanan.
Naghangyo usab nga mosalmot ang tanan sa ipahigayong cleanup drive karong Agusto 20, alas 4:00 sa hapon, aron nga malikayan ug wala nay mataptan pa joining maong dengue virus ilabi na nga daghan na ang namatay tungod lang sa lamok.