MOKABAT sa 239 ka mga indibidwal ang nasikop sa tinugyanan sa Cagayan de Oro Police Office (Cocpo) atol sa gipahigayong Oplan Galugad sa nagkadaiyang dapit sa siyudad sa Cagayan de Oro.
Anaa sa 145 ka malampusong operasiyon nga miresulta sa maong pagkasikop sa 239 diin 22 ka anti-illegal drugs, 11 ka wanted person, 180 nakalapas sa ordinansa sa siyudad ug 26 ka naaresto pinaagi sa pagresponde sa kapulisan.
Gibutyag ni Police Colonel Henry Dampal, Cocpo director, nga kini ang dunay pinakadaghang naaresto sa usa ka semana nga operasiyon.
"Highest number of person arrested/rescued, kay week-long nagsugod ta atong Monday atong gikasa. With this number, ubay-ubay na gyud ni. Mao na, most of these are minors," dugang niini.
Nasayran nga usa sa mga nasikop nga personalidad mao si Melyn Dela Cerna sa kasong may kalambigitan sa ilegal nga druga o Republic Act (RA) 9165 ug RA 1059, human nasapon nga nangawat og pitaka sa Purok 4, Puerto ug nakuhaan og usa ka unit sa .22 caliber revolver nga dunay upat ka mga buhing bala ug duha ka pakete sa gitoohang shabu.
Gidayeg ni Dampal ang mga estasiyon ug mga hepe sa ilang mga malampusong operasiyon ug pakigbatok sa kriminalidad.
Gipaabot usab ni Dampal nga dili sila mohunong diha sa pagpangdakop sa mga dautang elemento ug mapadayon ang Oplan Galugad. Ang mga menor de edad nga na-rescue ang gi-turn over na usab sa mga hingtungdan nga ahensiya.