HALOS walay nadalang mga gamit ang mga nabiktima sa sunog sa St. John, Puntod ug San Lazaro, Lapasan, syudad sa Cagayan de Oro, human niulbo ang dakong kalayo niadtong Sabado, Agusto 17.
Si Fretchel Ladra, 29, minyo, ug duol lamang sa balay diin nagsumikad ang kalayo lakip nga wala'y nadala sa ilang mga butang.
Matud ni Ladra nga nakadungog kini nga dunay nisinggit og sunog ug nakita niini sa ilang luyong bahin nga balay nga nagkalayo na.
Giingong gitabangan pa sa pagpalong ang kalayo, apan wala na kini nadala ug daling nikuyanap.
"Mga bata gyud akong gi-una gipagawas. Pagbalik nako kay naa man mi emergency box. Pag-abot nako, wala na. Sunog na," matud ni Ladra.
Sa dihang pagbalik niini, dili na kini makasulod tungod kay dako na ang kalayo.
"Naa koy alkansiya. Naa pa gyud mi huloga didto nga nasunog. Naabot nato og P15,000 ug piso nalang gyud akong nakita," matud pa.
Nasayran nga nanga nalitson usab ang mga binuhing baboy sa usa sa mga residente sa maong dapit.
Nagpasalamat nalang usab kini kay luwas ra ang iyang mga anak ug ang pamilya.
Nanghinaot na lamang si Ladra nga matabangan ug mahatagan og ayuda bisan sa mga nag-unang panginahanglanon sama sa mga sapot, banig, habol, unlan ug uban pa.