GIBIYAAN nga nilung-ag ang hinungdan sa dakong kalayo nga niugdaw sa gibanabana 100 kapin kon kulang ka mga balay sa boundary sa San Isidro Labrador, Barangay Lapasan ug St. John Tabaco, Barangay Puntod, Cagayan de Oro.
Sa inisyal nga imbestigasyon sa Bureau of Fire Protection, nagsugod ang kalayo sa balay ni Lucia Diaz, 68, mga alas 8:50 sa buntag.
Giangkon ni Diaz nga gibiyaan niya iyang nilung-ag kay nagkuha og lawog sa baboy.
Dako na iyang kakurat sa iyang pagbalik nga niulbo na ang kalayo.
Gisulayan pa sa pamilya ang pagpalong sa kalayo pinaagi sa pagbubo og tubig, apan wala na nila matabang ug dali nga nikaylap sa kasikbit nga mga balay nga ginama usab sa mga kahoy.
Tungod niini, dunay sakop sa pamilya ni Diaz nga nasamdan ug napaso.
Samtang gibutyag ni Fretchel Ladra, 29, kinsa duol lamang nga balay sa pamilyang Diaz, nga nakita nalang niini ang kalayo, hinungdan nga daling gidala ang iyang mga anak pagawas sa maong dapit.
"Pag-ingon nga sunog, gitabangan pa na og sabwag og tubig. Di naman madala. Ang mga bata akong gi-una. Makita raman diha sa luyo. Gipagawas nako ang mga bata. Pagbalik nako, di nako kasulod," matud ni Ladra.
Nagpasalamat nalang usab kini kay luwas ra ang pamilya ilabi na ang iyang mga anak.
Samtang gibutyag ni Senior Fire Officer 3 Samson Velarde, hepe sa Carmen Fire Station, nga gi-angkon na mismo sa pamilyang Diaz nga naglung-ag kini ug nabiyaan.
"Sila na mismo ang nag-reveal nga gikan sa ilaha, kay lage nagluto sila. Unya ilang nabiyaan. Pagbalik nila, dako na kaayo ang kalayo," matud ni Velarde.
Nasayran nga nakaangkon ang mga biktima og gagmay nga paso sa ilang lawas.
Gideklara kining fire control mga alas 10:09, ug gideklarang fire out mga alas 11:14, ug gisaka kini sa 4th alarm.
Gibanabana ngadto sa P500,000 ang inisyal nga danyos sa maong sunog ug gilauman nga mosaka pa kini.
Ang maong mga biktima ang kasamtangang anaa sa tunghaan sa maong mga dapit. Nanawagan usab ang mga residente ilabi na ang dunay mga malumong kasingkasing ug dunay kapasidad nga motabang nga mahatagan sila og ayuda.