USA ka mekaniko ang napalgan nga walay kinabuhi sulod sa iyang lawak sa alas 5:00 sa buntag niadtong Huwebes didto sa Luzville Subdivision, Barangay Panacan, siyudad sa Davao.

Ang biktima mao si Angelo Fanuncio, 27, ulitawo, lumad nga taga Isulan, Sultan Kudarat ug nagpuyo sa balay sa iyang igsuon didto sa Blk. 26, Lot 59, Luzville Subdivision.

Si SPO2 Rico Digamon sa Sasa Police Station nagbutyag nga ang biktima wala na mibangon sayo sa buntag mao nga gisusi ang lawak niini sa iyang igsuon nga si Cherel Fanuncio.

Matud ni Digamon nga nahibulong ang igsuon sa biktima sanglit wala na kini maglihok ug nagginhawa mao nga nangayo sila og police assistance sa pamasin nga matabang ang biktima.

Mga sakop sa Central 911 nga miresponde sa maong police assistance nagbutyag nga wala nay pulso ang ulitawo mao nga wala na kini gidala sa tambalanan.

Si Cherel nagsulti nga katapusan niyang nakita ang biktima sa sayong kagabhion niadtong Miyerkules nga mipauli sa ilang balay gikan sa trabaho.

Matud ni Cherel nga iyang nakita ang biktima nga nanihapon ug pagkahuman misulod sa iyang lawak dayon natulog mao nga nagduda ang mga otoridad nga giurom ang biktima.

Mga otoridad kumbinsido nga wala gituyo ang kamatayon sa biktima sanglit walay mga timailhan nga dunay laing tawo nga misulod sa iyang lawak.