NALUNOD ang barko nga gisakyan ni Andre gikan sa Manila. Sugo sa iyang maayong palad nabuhi siya ug gipadpad sa usa ka isla. Nabangalan siya sa baybayon sa usa ka mananagat nga midala kaniya sa ilang balay. Gipakaon siya ug gitambalan ang iyang mga samad, pangos ug bun-og sa lawas. Ang asawa ug anak nga dalaga ang nag-atiman kang Andre ug paglabay sa usa ka semana naulian siya sa kalagsik, Mikuyog na siya pagpanagat kang Mesyo nga singkwenta anyos na ang edad. Manghod niyag tulo ka tuig si Asion, iyang asawa. Ang ilang anak nga dalaga, si Keria, bayinte singko anyos, usa ka maestra sa publikong elementarya sa barangay Nagiban nga nahimutang sa usa ka lungsod sa Romblon. Mitug-an si Andre sa iyang ngalan ug edad nga bayinte siyete ug taga Sugbo. Gikan siya sa Manila tungod kay ang bar exam,pasulit sa mga gradwado sa abogasiya, adto man kanunay ipahigayon. Nagbarko lang siya pagpauli. Ug tungod sa kalit nga pagdaot sa panahon nakasugat og kusog nga unos ug dagkong mga balod ang barko ug nalunod. Wala dayon mopauli sa Sugbo si Andre kay nabag-ohan siya sa kinabuhi sa probinsiya. Sa dakbayan sa Sugbo man god siya natawo ug nidako. Nawili sab siya kang Keria nga maanyag ug buotan ug nahitukna sa babayeng gipangandoy niya nga dad-on sa altar sa kaminyuon. May gugmang misubol sa iyang kasingkasing,
Usa ka buntag sa adlaw nga Dominggo didto sila Andre ug Keria sa baybayon. Daghan ang mga tawo nga nangaligo sa dagat. Samtang sila naglakaw sa puting balas gitug-anan ni Andre ang dalaga sa iyang gibati.
“I love you, Ria! I want you to be my wife!” padayag ni Andre nga migunit sa kamot sa dalaga dihang nanghunong sila sa dapit sa baybayon nga pipila lamang ka tawo ang nangaligo sa dagat.
Nakalitan si Keria. “Ha?!” Unya mipadayon siya dihang mihupa na ang iyang kahikurat, “Ay, bunga lang na sa imong kamingaw sa imong uyab nga tua sa inyo, Andre, uy!”
“Sayop ka, Ria. Wa koy uyab sa amo, Wa pa ko mahigugma og babaye sukad. Modayeg lang. Karon lang kining pagbatia migahom nako nga nahidagsa dinhi sa inyo!” ni Andre.
Mitutok si Keria kang Andre. Salabtunon silang nagtinutokay. “Ang pagdawat sa gugma dili dihadiha, Nagkinahanglan kinig igong panahon sa pagtimbang,” ni Keria.
“Apan gusto kong mahibaw-an ang imong tubag sa di pa ko mopauli sa Sugbo,” nagpakisi si Andre. “Gusto kong mahibawo nga may pagbati sab ka kanako.”
“Di ko kana mahimo. Basig masakitan lang kitang duha. Pauli una sa inyo ug pasagdan nato ang panahon maoy mohukom,” ni Keria. “Okey. Apan isaad ko nimo, Ria, nga mobalik ko dinhi, kay dia dinhi ang gipangita kong langit!” ugdang nga namulong si Andre.
MIPAULI si Andre sa dakbayan sa Sugbo sakay sa barko gikan sa Romblon. Hilabihang kalipaya sa iyang ginikanan ug duha ka igsuon sa iyang paghibalik. Usa man siya sa natala nga ‘missing’ sa pagkalunod sa M/V ULPIANA sa kadagatan sa Romblon.
Pagkasunod tuig gi-release ang resulta sa ‘bar exam.’ Usa si Andre sa nakapasar. Nangandam dayon siya aron mobalik sa Nagiban. Nagpalit siyag ‘engagement ring’ isip pangandam kon sugton siya ni Keria. Diha poy iyang gipamalit nga mga hinagboan para nilang Keria, Asion ug Mesyo.
Nianang pagka gabii sa adlaw sa paghiabot ni Andre sa ilang Keria, didto sa kayda sa balay nagtupad ang duha nga naglingkod sa lingkuranang kawayan. Giusab ni Andre pagsulti ang iyang gugma kang Keria nga wala magmakuli psgtando niini. Gikuot ni Andre ang singsing sa iyang bulsa ug miluhod sa atubangan ni Keria.
“Will you marry me?” ni Andre nga mipahiyom.
“Yes!” tubag ni Keria nga nagluha ang mga mata. Sa pagka tinuod, mibati na siyag gugma kang Andre kaniadto sa dinhi pa kini sa ila samtang nagpaalim pa sa samad ug pangos. Mitindog si Andre ug mibalik paglingkod tupad ni Keria. Iyang gisul-ot ang singsing sa tudlo ni Keria. Unya hugot silang nagginaksanay samtang nag-akob ang ilang mga ngabil. “Ria, ikaw ang gipangita kong langit!” hagawhaw ni Andre, (KATAPUSAN)