Tambagi ko Noy Kulas: Mangander

DEAR Noy Kulas,

Ako diay si Z, 38 years old. Ang akong ipatambag nimo bahin sa akong uyab nga aggressive kaayo. Maguwang ni siyag nako og 5 years.

Biyuda siya ug negusyante while ako single pa hangtod karon. Angkan siya pero dagko na ang iyang mga anak. Maayo sila pagkabutang kay maayo siya sa negusyo. Tanang gasto sa among mga laag iyaha. Serious ko ani niya pero nahadlok ko kay naa ang character niya nga isog or kanang dominant.

Kon ma-late ko sa among sabot, isog na kaayo siya. Mauwaw ra ko kay iya kong yawyawan bisan daghang tawo. Kon magselos siya, managpa or mangusi. Kuwang na lang gani nga bugnuon ko. Agresibo sab siya sa kama. Moangkon ko, lupig ko niya sa kama kay siya sige og zumba ug aerobics sa ilaha while ako way exercise. Mag yoga pa gani siya.

Noy, gawas aning tanan, di na ko ko kakita og apan niya. Serious ra ba siya kay gusto siya magminyo mi bisan pa siya ang mogasto. Ang mga bata way problema. Ang problema ani niya kay dominante kaayo. Please hatagi ko sa imong opinion.

Z

Z,

Mas maayo nga mag-estorya mong duha aron maklaro ninyo ang inyong padulngan ug matuki ninyo ang imong naobserbahan nga batasan niya. Sultihi siya sa imong apprehension, labina kon giunsa ka niya pag-treat aron makahibawo siya nga wa ka makauyon. Kanang estorya nga di ka manginsulto niya. Ingna siya nga nahadlok ka nga kon magminyo mo, anderon ka niya.

Kon sa imong tan-aw dunay maayong epekto sa inyong pag-estorya, diha ka na mohukom kon magminyo o di. Unsa man, ganahan kang makaanak mo? Kanang edara momabdos pa na but mas maayong mokonsulta ka og doktor. Nag-mention ko ini kay daghan sab sa mga lalake nga mangita og anak unya di na pwede makaanak ang babaye or dunay depekto ang lalake. Sa imo nang giingon, maayo siya sa exercise, so posibleng makaanak pa siya.

Kayod sab aron economically di ka niya buhion. Lisod gud kon magpabuhi ka niya, sama aron nga kon magkita mo, ikaw ang iyang gastuhan. Mas maayo nang mopakita kang dunay kaya kay aron usab morespetar siya nimo.

NOY KULAS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph