KADAKO diay nga isyu aning gender identity nga nakapaukay karon sa madlang pipol.
Kini tungod sa nahitabo sa transgender nga si Gretchen Diez nga gipagawas sa janitress nga adto unta mogamit og CR sa mga babaye.
Apan gipasabot ta ni Wendy Mendoza nga ang transgender ug transsexual dako og kalainan.
“All transsexual persons are transgender. But not all transgender persons are transsexual,” matod pa ni Wendy, ang labing unang Cebuano nga niladlad nga transsexual human nagpa-opera sa Sri Lanka niadtong Enero 1993.
Sa ato pa, ang mga transgender mao tong mga crossdresser nga maorag babaye tan-awon pero duna gihapoy kinatawo sa lalaki.
Samtang ang mga transsexual mao tong mga nagpailis na sa ilang kinatawo.
“Mao gyud na siya’y saktong medical term base sa gisulti sa akong doctor.”
So, kanang mga transgender puwede ra gyud unta na mangihi sa CR sa mga lalaki kay nagbitay pa man nang ilaha. Apan sa mga transsexual nga sama sa kaso ni Wendy siyempre adto na gyud na sila sa mga babaye.
Mao nga sa bag-ong branch nga beauty parlor nga ablihan ni Wendy karong September sa Talisay butangan kuno niya ang iyang CR og “for all gender” aron klaro. Haha.. Sa mga all-around beauticians, apply na!
Morissette
Kon tinuod ning balita nga nibiya na si Morissette sa balay sa iyang parents kay mas gipalabi ang uyab, ang akong masulti ani pagkawa niyay puangod nga pagkaanak.
Asa man ni iyang uyab sa panahon nga wa pa siyay pangan sa industriya?
Dugay kaayo siya sa TV5 pero nisikat ba siya? Nisikat ra siya pagbalhin niya sa ABS-CBN ug siya mismo niangkon nako ani pagbisita niya sa Superbalita Cebu kauban ang iyana mama niadtong 2013 pila ka adlaw human sa grand finals sa The Voice Phils Season 1 sa ABS-CBN.
Ayaw palabi sa imong gibati `day uy. Mientras buhi pa ang atong mama ug papa ato gyud nang panggaon. Kanang uyab puwede ra na mailisan. Pero ang mga ginikanan, nag-inusara ra gyud na.