KON si Cebu City Vice Mayor Michael Rama ang pabut-on gusto niya nga usahon ang Cebu City Jail ug sa Cebu Provincial Detention and Rehabilitation Center (CPDRC) ug ibutang kini gawas sa dakbayan. Kini aron masulbad ang problema sa congestion o kahuot karon sa maong duha ka mga bilangguan. Ug sa ingon magamit usab ang maong mga jail facilities isip rehabilitation centers alang sa mga nagumon sa illegal nga drugas.
Nagka-problema usab karon ang mga molopyo sa Kalunasan diin anaa mahimutang ang duha ka mga bilangguan gumikan sa kabaho nga mugna sa mga hugaw nga gi-dispose sa maong bilangguan. Mao man gani kini ang hinungdan nganong gideklarar nga ubos sa state of calamity ang barangay. Ang City Jail sa kasamtangan adunay 5,800 ka mga piniriso, 4,439 niini mga lalaki samtang 898 ang mga babaye ug 63 ang anaa sa Operation Second Chance, bilangguan sa mga minor de edad.
Aduna usay 400 ka mga piniriso gikan sa Naga City Jail nga temporaryong anaa diha human gideklarar nga delikado ang Naga City Jail sa landslide. Ang City Jail aduna lang unta kini kapasidad nga 1,900 ka mga binilanggo. Samtang ang CPDRC adunay 2,448 ka mga piniriso. Aduna lang unta kini kapasidad nga 1,600.
Samtang ang nga Provincial Jails gidumala aa mga Provincial Governments ug ang mga municipal ug city jails gidumala sa Bureau of Jail Management ane Penology (BJMP) nga ubos sa Department of Interior and Local Government (DILG). Niining maong set up, kinsa man unya ang mogasto sa pagtukod sa maong hinu-usang bilangguan? Kinsa man ang mo-manage, ang BJMP o Capitol? Ang budget alang sa pagkaon sa mga piniriso? Ang budget sa BJMP sa city jail kuwang pa na og gipun-an lang sa city government.
Ngano ato mang bungkagon ang set up. Kon maghuot na,aw, magtukod og bag-ong mga buildings. Gawas pa, morag nagkinahanglan pa kini og national law. Nganong dili man awhagon nato ang atong mga magbabalaod nga momugna og balaud nga magtukod og Department of Corrections aron ma-usa ang tanang pagdumala sa atong penal system? (bobbygnalzaro@gmail.com)