USA pa lang gani ka adlaw human milusad ang Cebu City Government og clean up drive sa sapa sa Guadalupe, nasuta nga padayon gihapon nga nanglutaw ang mga basura sa sapa sa Pasil niadtong Dominggo.
Ang Pasil River maoy sumpay ug lutsanan sa tubig nga gikan sa Guadalupe River paingon na didto sa dagat.
Usa ka residente sa Pasil nga si Angel Gimena ang mitug-an nga pipila lang kagutlo gikan sa pagkahuman sa clean up drive niadtong Sabado, pipila usab ka mga tawo sa ilang dapit ang nanglabay dayon og mga sinako nga sagbot.
“Maluoy ta sa sapa nga mapuno sa sagbot. Ngano di na man lang gyud ilabay sa sakto,” matod sa laing residente kinsa sama ni Gemina nasurprisa sa iyang nakita.
Buot ipasabot nga wa mosalir ang panawagan sa local government nga unta makig-ayuda ang mga tawo nga mahinlo ang mga sapa.
Tungod niini, ihinagbo ni Mayor Edgar Labella ang 80 ka mga barangay captains uban sa pangulo sa Cebu City Disaster Risk Reduction and Management Office nga si Harold Alcontin aron tukion ang maong problema.
Atong gihangop kining hingusog nga kampanya sa dakbayan kalabot ning maong programa, pero bisan unsaon pa kini nila sa pagpasunod lisod kini nga mahatagan og katumanan kana kon dili sila hugot nga mopahamtang og silot niadtong mga malapason sa balaod.
Labaw sa tanan, angayan usab lantawon sa atong pamunoan kon duna bay sarang nga alternatibo nga maoy kapadulngan sa mga tawo aron malikayan ang pagpanglabay og basura sa sapa.
Usa na niini ang pagbutang og mga garbage bin ug basurahan nga haduol sa mga residente nga maoy ilang magamit nga alternatibo malangan sa pagkolekta ang atong mga basurero.