DUHA ka mga bata ang biktima sa hit and run niadtong Huwebes diin mga biktima pulos nilanding sa Northern Mindanao Medical Center (NMMC) ning siyudad sa Cagayan de Oro.

Unang biktima mao si John Clark Magan, 6, taga lungsod sa Kinoguitan, Misamis Oriental ang nakaangkon og ubay-ubay nga bun-og sa lawas human nabanggaan sa Starex van niadtong Huwebes mga alas 8:20 sa buntag.

Mitabok ang biktima tunga sa kalsada diin padulong pa sa tunghaan niini dihang kusog nga starex van ang niagi hinungdan sa iyang pagkasapon.

Dili tiaw ang naangkon niining bun-og ug pangos diin human sa hitabo gibiyaan lamang nga nagbuy-od ang biktima tunga sa kalsada.

Unang gidala sa doul nga balay tambalanan si Magan apan giduso sa NMMC ning siyudad tungod sa naangkon niini.

Samtang laing biktima mao si Bernadette Escalada, 2, taga Brgy. Natumolan, lungsod sa Tagoloan, Misamis Oriental.

Nahitabo ang insidente samtang paingon nga motabok sa eskwelahan ang biktima.

Nasapon kini sa kusog nga nipadagan nga motorsiklo hinungdan sa pagkaligid niini susama sa nahitabo ni Magan, gibyaan gihapon nga naguby-od ang biktima tunga sa dalan nga nagkadugo, ubay ubay nga pangos sa lawas ang naangkon ni Escalada.

Ang mga nakasaksi ang daling midala sa biktima sa NMMC apan pakyas nga wala makuha ang plaka sa motorsiklo nga mibangga tungod kay nipakusog naman kini sa pagpadagan. (SVB)