MGA school building sa Siyudad sa Talisay giimbentaryo sa Department of Education sa Talisay City School division aron pagsuta kon pila pa ka mga edipisyo sa mga pampubliko nga tunghaan ang wa pa ma-insured.
Gihimo kining lakang human nasuta nga mga lawak saringan nga naapektuhan sa sunog sa Talisay way insurance.
Nakigtagbo sa miaging semana si Talisay City Mayor Gerald Anthony Gullas kang Deped Talisay City Division head Arden Monisit aron pakisayran ang pagpaayo sa apektado nga mga lawak saringan diha sa Talisay City Central School.
Ang stockroom sa tunghaan nasunog niadtong Agusto 12, diin nakan-an ang lima ka mga classroom sa tulo ka andana nga school building. Apan nasuta sa mayor nga gikinahanglan pa nila mangita og laing paagi aron matabangan sa pagpaayo sa mga classroom kay nasuta nga wala pay insurance ang tulo ka andana nga edipisyo.
Nasuta sa mayor nga matag human og patukod sa Department of Public Works and Highways (DPWH) sa mga school buildings, i-turn-over physically ang estraktura, apan way apil niini ang mga dokumento kay aduna pay usa ka tuig nga gitagana ang DPWH aron kon adunay guba, sila sa departamento ug kontraktor ang moayo.
“Pero sa atong question nila, nga kay wala pa sa DepEd ang documents, nya within that one year kon naay mga insedente sama sa sunog, moayo ba sila. Tubag nila nga dili man sad. So, ato na gihangyo nga if pwede masayo og hatag ang documents, so that we can use funds from the City government or from Deped, to purchase insurance, kay kon naay sunog or any calamities, insured na ato school buildings,” asoy ni Gullas. (FMD)