ANDAM si Kongresista Paz Radaza nga mobayad og abangan sa paggamit niya sa district office nga nahimutang sa ikaduhang andana sa Lapu-Lapu City Hall, gamit ang iyang district fund.
Apan, si Lapu-Lapu City Mayor Junard Chan wa magkinahanglan sa iyang bayad sa abangan ug iyang gihulagway palusot lang ang tanyag sa kongresista.
Sa labing unang higayon, nipatawag si Radaza og press conference sukad nga milingkod isip kongresista.
Ang maong presscon gipahigayon sa usa sa mga buhatan sa multi-purpose hall sa Barangay Basak, kagahapon, Lunes, Agosto 19.
Mipadangat og opening statement ang opisyal nga naghisgot sa iyang kaikag sa unang adlaw sa iyang pagsugod isip representante sa distrito sa Lapu-Lapu, apan nasagulan og kaguol sa dihang gipapalayas siya sa administrasyon ni Chan.
“That was shocking and traumatic. Like any other public office our district office was there to serve our people, to serve the Oponganons,” tipik sa pamahayag ni Radaza.
Matod pa nga sama sa ubang national offices nga naa sa city hall compound nga nagtunol sab og serbisyo nga susama ra og katuyoan sa iyang district office.
Ang satellite office sa Land Transportation Office, Department of Interior and Local Government, Local Civil Registrar ug uban pa nahimutang sa city hall compound.
“Maingon nato nga ‘one stop shop’, this is the thing gi-encourage sa DILG nga ang katawhan dili nato lisud-lisuron ang pagdeliver sa services, dali nalang kaayo,” pasabot ni Radaza ilabi na nga ang district office natukod sukad niadtong 2010 sa dihang nahimong distrito ang dakbayan.
Nabalaka sab ang kongresista nga gawas sa giingong harassment nga nasinate sa iyang mga staff ang kadtong mga konstituwente nga adunay tuyo sa iyang buhatan ang babagan sa ubos nga bahin sa city hall og pahibaw-on nga wa nay congressional office ni Radaza sa may 2nd floor.
Dugang ni Radaza nga magsilbi niyang central office ang maong nakontrobersiyal nga district office ug naglaraw nga moabli sab og duha ka satellite office nga mahibutang sa Basak ug Pusok.
Sa laing bahin, mi-react si Chan sa maong kalambuan nga nagkanayon: “Wa mi magkinahanglan sa iyang abang, nagkinahanglan mi og space. That (district office) belongs to my office nganong ipamugos pa man.”
Iyang gipahibawo nga naghuot na ang iyang staff diha sa iyang buhatan ug aduna say mga departamento ug division sa city hall nga nagkinahanglang og dugang office.
Panawagan sa mayor nga magrespetaray sa usag usa kay susama niya pulos silang nagserbisyo alang sa mga Oponganon. (FVQ)