GIPADAYAG ni Kongresista Paz Radaza sa lone district sa dakbayan sa Lapu-Lapu nga dako og natabang sa turismo sa dakbayan ang kanunay nga pag-host sa dakbayan sa Ironman matag tuig.
Matod sa kongresista nga gawas nga daghang turista ang nibisita sa dakbayan tungod sa Ironman kadaghanan usab niini pulos nag-home stay hinungdan nga ubay—ubay usab nga mga Oponganon ang nakapahimulos sa pagdagsa sa mga turista.
Gipasabot ni Radaza nga tungod usab kanunay nga pag host sa Ironman naedukar usab ang mga Oponganon sa pagtratar ug mga bisita sa dakbayan.
Sa iyang personal nga opinyon angay lang gihapon nga mo-host ang dakbayan sa Ironman sa umaabot bisan sa mga komento sa uban nga wala makakwarta ang dakbayan sa maong kalihukan.
“Natabangan nato ang katawhan kay dili man lang na sila sa Shangri-La naa may daghan nag home stay ana pagbuild up sa tourism it’s not always pangwarta ang atoang tuyo mga indirect nga buildup in the future like ana nga na established na ang Ironman the athletes come back here not for the Ironman but for the city,” pasabot ni Radaza.
Ang pamahayag giluwatan sa kongresista bisan pa man kun nag-atubang siya karon og kasong may kalapasan sa Republic Act RA 3019 kun Anti-Graft and Corrupt Practices Act gumikan sa giingong pag-re-align niya sa m sa Ironman karong tuiga.
Gipasakaan ug kaso si Radaza sa duha ka indibidwal nga sila si Teobanes Patalinghug ug Efren Aying sa Office of the Obudsman gumikan sa pag re-align niya sa moabot P8.7 milyunes nga dugang budget unta sa Ironman.
Nasayran nga miabot lang sa P9 milyones ang budget sa Ironman karong tuiga itandi sa gitagana untang P18 Milyones nga giaprobahann sa konseho sa wala pa gi re-align ni Radaza ang budget.
Apan pasabot sa kongresista wala siya mahulga sa kaso sanglit aduna siyay special authority sa budget ordinance sa dakbayan sa pag re-align sa budget kung kinahanglanon.
Iyang nadesisyonan ang pag re-align sa P8.7 milyoues tungod kay gigamit kini niya sa pagbayad sa mga suweldo sa mga kawani nga naglangkob sa travel expenses, survey expenses, award/rewards expenses ug other supplies expenses.
Kung gigamyan ra unta ang administrasyon ni Lapu-Lapu City Mayor Junard “Ahong” Chan sa nahabiling P9 milyunes nga budget sa Ironman mahimo raman unta kini matod pa ni Radaza nga mangayo ug supplemental budget sa konseho. (GCM)