SECTIONS
Friday, September 20, 2019
SUPERBALITA CEBU

Pulis ‘killer’ sa Hapon

NASIKOP sa Toledo City police station ang usa ka pulis sa Dakbayan sa Talisay human gitudlo nga maoy nipusil patay sa usa ka Hapon niadtong Dominggo sa buntag, Agusto 18, sa Climaco street, Barangay Poblacion, Dakbayan sa Toledo.

Si Patrolman June Canillo Zamora anaa na sa kustodiya sa Toledo Police.

Matod ni Police Brigadier General Debold Sinas, hepe sa Police Regional Office 7, way nakakita sa pagpamusil.

Apan si Zamora, kinsa taga Toledo City, nakit-an nga mibiya sa dapit human madungog sa mga tawo ang buto sa armas.

Motibo?

Bangi sa napalit nga kabtangan ni Akiro Togo, 71, ang usa sa mga motibo.

Ang hinigugma ni Zamora, matod pa, niokupar sa napalit nga balay ni Togo.

Giingong gipasanginlan ni Togo ang pulis nga kurakot hinungdan nga napungot kini.

Nakuha sa mga imbestigador sa Toledo police ang paltik nga armas nga gigamit sa pagpusil patay.

Kasong murder ang giandam na sa kapulisan batok kang Zamora.

Si Zamora, 32, sa pakighinabi ni Talisay Police chief Police Major Orlando Carag Jr., nisulti nga “self defense” ang hitabo.

Saysay ni Zamora ngadto kang Carag nga naghatod siya sa iyang uyab sa balay. Ang tupad nga balay iya ni Togo.

Giingon nga kalit lang siya gitudlo-tudlo sa Hapon ug nibunot og armas nga gition ngadto kaniya.

Samtang namulong nga kini “ahh Filipino police, corrupt.”

Sa dihang gition ang armas, dali kini giilog ni Zamora hinungdan nga nahitabo ang panaglayog hangtod nga nakabuto.

Nakita ni Zamora nga naigo si Togo.

Giingon nga daan na nga makiglalis si Togo sa pamilya sa uyab ni Zamora.

Sinugdanan

Lima ka tuig na ang nakalabay, nakapalit og yuta ug balay si Togo sa siyudad sa Toledo.

Siya ug ang iyang uyab maoy ningpuyo sa balay.

Gipanghatagan pa og yuta ang mga ginikanan sa iyang hinigugma.

Apan sa dihang miaslom ang relasyon ni Togo ug sa iyang uyab, ang igsuong babaye sa iyang hinigugma nipuyo niini.

Ang igsuong babaye sa kanhi uyab ni Togo maoy hinigugma ni Zamora.

“Siguro nasulsolan whatever ang pulis. So, nag-init ang maong pulis. Nya kini si Akiro nag-estorya pa nga ang police corrupt, ingon ana. So, mas lalo napungot ang pulis (Zamora). And he (Zamora) also heard, according sa iyaha yung victim, is also engaged in molestation. But I told him na it’s not a ground nga patayon nimo,” asoy ni Sinas sa ilang panagsulti sa iyang sakop.

Sa pagkasikop ni Zamora, nasulbad na ang kaso, matod ni Sinas.

Nasubo si Sinas sa hitabo kay pulis pa ang naka patay.

Bisan pa niini, kinahanglan nga manubag si Zamora sa salaod.

Nakig-alayon usab ang PRO 7 sa police attaché sa Japan consulate sa Cebu samtang ang balay nga gipanag iya ni Togo gipasirado ni Sinas.

Walay makapuyo samtang maklaro kinsa ang nanag-iya niini tungod kay ang Hapon man ang nipalit sa balay ug yuta.

Gitug-an ni Carag sa Superbalita Cebu nga gihulagway si Zamora sa iyang kaubanan, nga maayo, kasaligan ug kugihan sa trabaho.

Usa ka imbestigador sa Talisay Police Station, si Zamora nag-schooling karon sa criminal investigation course.

Gipasalig ni Sinas nga ang kamatayon ni Togo di makaapekto sa maayong relasyon sa gobiyerno sa Japan ug Pilipinas kay kini isolated nga kaso.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph