Balkman mabalik og kontra sa Gilas?

ADUNAY poruhan nga ikasangka og balik sa Gilas Pilipinas ang kanhi import sa PBA nga si Renaldo Balkman sa 2019 FIBA Basketball World Cup nga sugdan karong Agusto 31 sa China.

Kini human gilakip si Balkman sa national training pool sa iyang nasod nga mao ang Puerto Rico. Sa press release sa Federacion De Baloncesto De Puerto Rico, giingon nga gidawat sa 35 anyos nga si Balkman ang imbetasyon sa Puerto Rico.

“Given the need for versatile and athletic players in our delegation, we invited Renaldo Balkman to join the national preselection and, after being presented with the same agreements as his other teammates, the athlete accepted and will be accompanying us in China,” pamahayag ni FDBDR president Yum Ramos nga napatik sa Spin.ph.

Nidugang si Ramos nga grabe ka interesado ang kanhi magduduwa sa National Basketball Association (NBA) nga makarepresentar og balik sa iyang nasod.

Si Balkman sakop sa Puerto Rico squad nga ningpukan sa Gilas sa 2014 Fiba World Cup nga gipahigayon sa Seville, Spain.

Kon makasulod si Balkman sa Final 12 sa Puerto Rico, hayan posibleng ikaharong og balik sa kanhi import sa San Miguel Beermen ang Gilas sa 2nd round sa classification phase sa matag upat ka mga tuig nga kompetisyon.

Gawas sa PBA, si Balkman nakaduwa sab sa Pilipinas isip import sa San Miguel Alab sa Asean Basketball League (ABL) ug Mighty Sports sa 2019 William Jones Cup diin napili siyang MVP. (ESL)