SECTIONS
Sunday, September 15, 2019
SUPERBALITA CEBU

Argao ang naghari sa Alcantara Mayor’s Cup

HARI SA ALCANTARA: Si Alcantara Mayor Fritz Lastimoso (ikaupat sa nagbarog gikan sa tuo) uban ni vice mayor Felix Ferraren ug konsehal Larry Llenos maoy mi-award sa championship trophy ug P100,000 nga cash prize ngadto sa Argao team, human malangkat ang titulo sa 2019 Alcantara Mayor’s Cup inter-town basketball tournament. (Jun Migallen)

YANONG gilangkat sa Argao ang kampiyonato sa 2019 Alcantara Mayor’s Cup inter-town basketball tournament pinaagi sa pagkulit og 70-57 nga kadaugan batok sa Moalboal sa final match niadtong Sabado nga gipahigayon sa Big Dome sa lungsod sa Alcantara.

Ang panagkumboya sa reinforcement nga si Sheldon Gahi, pointguard sa University of the Visayas Green Lancers, ug Jimwell Torion Jr., anak ni kanhi PBA star ug Argao headcoach Jimwell Sr., maoy nahimong mahait nga hinagiban paingon sa kadaugan.

Sa third quarter misuway sa pagsikit ang Moalboal nga mitibhang sa bintaha ngadto sa singko puntos na lang apan wa kini makalahutay sa ikaupat nga kanto bisan pa man sa kusganong pagpanglimbasog sa Moalboal.

Gawas sa tropeyo, ang Argao malipayong misakiyo sa P100,000 nga ganting salapi samtang ang Moalboal maoy nakaluklok sa P50,000.

Sa sayo pa, ang Naga City Electifiers mipatapsing sa Badian, 86-80, aron labnihon ang third runner up honor.

Sinaksihan sa mga nagdasok nga mga basketball fans, lakip na ang mga gikan sa nagkalainlaing kasikbit nga lungsod, niagi una og makutas nga kombati ang Naga nga ubos sa pag-coach ni kanhi PBA player Renato Alforque ug Max Delantes una pa nila mabuntog ang Badian. Sa kadaugan, ang Naga mibulsa sa P30,000 samtang P20,000 usab ang naangkon sa Badian.

Ang kompetisyon maoy usa sa mga dakong kalihukan ning naghinangat nga kapistahan sa lungsod sa Alcantara nga karon ubos na sa pagdumala batam-on ug aktibong mayor nga si Mayor Fritz Lastimoso.

“Actually, it’s not only basketball but there are some other sports nga ato sab nga gihimo. This is part sa atong kausaban nga gilantaw sa lungsod. Naa tay billiard, volleyball, chess, dama ug uban pa. Unya duna sab tay amateur boxing. Basta tumong nato ang sports development ug sports tourism,” matod ni Lastimoso.

Ang kinatibuk-ang konseho sa lungsod nga gipangulohan usab ni vice-mayor Felix Ferraren ug sa mga sakop nga sila si Hon. Litoy Lambo, Andres Timtim, Belen Lobitana, Larry Llenos, Julie Bayato, Marvin Pulog, Richard Pulgo, Joshua Catapusan, ABC president Godofredo Tabanao ug SK Federation Pres. Tegie Matilos ang miitsa usab sa ilang hugot nga suporta.

Si Commissioner Rey Canoy, mapasalamaton sa tanang mga sa malampusong nga tournament.

Misuporta usab kanila sila si Engr. Rodolfo Borja, Engr. Nelson Ogie ug Macdiv Promotions.

Kaabag ni Canoy sa pagpadagan sa tournament sila si Jay Ar Justiane, Woodrow Sia, Gammy Lamosao ug Municipal Engr. Arthuro Palencia. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph