MAGSAYSAY, Davao del Sur -- Patay ang usa ka babayeng menor de edad, samtang iyang laing kauban nadala sa bay tambalanan human gipangdunggab sa lalaking ilang gibalibaran.
Nahitabo ang insidente sa Barangay Kasuga, ala 1:44 sa sayong kaadlawon, Lunes, Agosto 19.
Sa gipaguwang taho sa Magsaysay Municipal Police Station, ang namatay nag-edad og 16, Grade 9, ug molupyo sa Purok 7, Barangay Dalawinon.
Ang kuyog niining higala nga naangol nagpangedaron sab og 15-anyos, Grade 9, ug molupyo sa Purok 6, Dalawinon.
Giingong mga biktima gikan nitambong og disco party sa Barangay Kasuga.
Ang imbestigador nga si Police Staff Master Sergeant Jerome Quaipo nagbutyag nga ang suspek mao si Jan Michael Pakiwag Daweng, 18, Grade 12, ug molupyo sa Purok 7 sa nahisgutang dapit.
Kuyog sa suspek ang laing mga kaubanan nga nagsakay og duha ka motorsiklo dihang gigukod niini ang mga biktima nga naabtan duol sa imburnal sa Leynes Compound sa Barangay Kasuga, ug gihagad ang mga menor, matud pa, og sex.
Ang mga biktima nibalibad ug nipadayon sa paglakaw, apan gigukod ni Jan Michael ang 16 anyos nga biktima ug gidunggab sa makadaghang higayon tumong sa totoy, walang kamot ug liog mao nga namatay gilayon.
Nabangalan sab ang biktima nga naglutaw na sa tubig sa imburnal, samtang ang 15 anyos nga kauban nadunggaban sab sa nagkadaiyang bahin sa kalawasan ug gihatud ngadto sa Davao del Sur Provincial Hospital.
Sumala ni Quaipo nga nasikop na nila ang suspek nga si Jan Michael didto sa panimalay niini atol sa paglusad sa manhunt operation apil ang kutsilyong gigamit sa pagpanunggab.
Gihikay dayon sa kapulisan ang kasong murder ug frustrated murder samtang gitun-an nila kon malambigit sa kaso ang ubang kauban sa suspek.