IMBES priso gikan sa usa ka adlaw ngadto sa 30 ka adlaw o unom ka bulan, imong silot mao nalang ang paglimpiyo o ubang kalihukan ug serbisyo sa komunidad.
Kana, kon makahimo ka og minor offenses apan magdependi hinuon sa korte.
Gipirmahan ni Presidenti Rodrigo Duterte ug balaod na kining Community Service Act diin nag-ila sa polisiya sa gobiyerno pagpalambo ug pagpalig-on sa hustiya ug sa samang higayon pagpaluag sa atong prisohan.
Gihimo na kining sa uban nasod, ilabi na sa Estados Unidos sa America ug nahimong epektibo ang maong programa. Apan, dili garantiya nga mokunhod ang kreminalidad bisan sa gagmay'ng salaod.
Dunay minor offense nga dili gyud kinahanglan ang silot nga pagkabilanggo. Kalbaryo sa usa ka tawo nga isulod sa selda sa gamay lamang nga salaod. Kay dihang mabalhog ka, lahi na ang pagtan-aw sa uban, giisip ka na nga kriminal.
Daghang mga serbisyo sa komunidad nga mahimong gamiton ani nga programa. Dili lang ang pagpanglimpiyo, apan apil na diha ang mga maintenance sa mga pasilidad sa gobiyerno.
Apan, siguradohon gyud sa gobiyerno nga mapatuman kini nga programa sigun sa iyang katuyoan. Basin baya nga mosiaw dinhi ang pangukarot.
Dili baya malikayan nato, dunay uban nga gusto lang mobayad inay motrabaho sigun sa silot unya sa korte.
Ang mas maayo unta, gawas sa community service, dunay himoon nga moral value formation sulod sa pipila ka oras o adlaw alang niadtong dinakpan.
Diha sa paghatag og lecture ug pagtulon-an kabahin sa maayong gawi, spiritual man o dili, mapasantop sa tawo ang ka importanti sa iyang kaugalingon ug ang iyang tahas sa katilingban.
Bisan kon makakompleto na sa community service, apan wala gihapon mausab ang iyang kinaiya tungod sa kakuwang og giya, magpadayon gihapon ang tawo sa paghimo og salaod.
Lahi ra gyud kon mapasantop ang maayong pagtulon-an labi na ang pag-establisar nato og maayong relasiyon sa katawhan, kay sa daotang impluwensiya sa palibot.
Angay nato dasonan kining programa uban sa tinguha nga dunay pagkausab pagbag-o sa mga tawo nga nakahimo og minor nga mga salaod.