GIGISA sa sesyon kagahapon sa Sangguniang Panlalawigan ang mga personahe sa Misamis Oriental Electric Services Cooperative II (Moresco II).
Mitambong sa maong sesyon ang Moresco II general manager nga si Engr. Ronel B. Cañada uban ang pila ka mga myembro sa Board of Directors.
Kini human sa niaging sesyon, atol sa privilege speech ni Sangguniang Panlalawigan Member Wayne Militante, nagpatawag niini tungod sa dili maantos nga sunod-sunod nga brownout labina gyod sa Distrito Uno.
Gipasabot ni Cañada nga nasinati ang power interruption gumikan sa daot nga panahon ug ang pipila ka poste nga mokonektar sa linya ang apektado.
Apan si Board Member Buboy Sabal namugos nga bisan walay bagyo ug dili daot ang panahon, gakasinatian gihapon ang brownout.
Apan si Cañada nipasabot nga daw usahay dili lang masabtan ang operasyon. Adunay mga area o linya sa Moresco nga layo kaayo ug naapektuhan dili lang sa bagyo o daot nga panahon apan kusog nga hangin ug uban pa nga factor nga layo kaayo biyahion sa personahe.
"Upgrade your services, upgrade your lines...'" matud ni Sabal.
Hinoun aminado si Cañada nga mao kini ilang gilihok karon nga ma upgrade ang ilang mga linya lakip tibouk sistema sa Moresco II, apan nangayo kini ug pagsabot sa operasyon gumikan sa kulang sa budget niini ug dili pa aprobado ilang hangyo.
"Wala baya mi nalipay nga sige og brownout kay kami man ang gakaalkansi," matud ni Cañada sa interbyu sa Superbalita Cagayan de Oro.
Gitubag sab niini nga coincidence lamang ang gakahitabong brownout panahon adunay mga selebrasyon, pagtapos sa teleserye, championship sa dula ug uban pa diha sa telibisyon.
Gani si Board Member Dexter Yasay mikwestyon sab sa serbisyo sa Moresco II.
"Matingala kita kay sige diay bagyuhon ang District 1 unya dili man lagi ang Distric 2?" matud ni Yasay.
"Among hangyo nga ayaw namo ug brownout," matud ni Board Member Nancy Madjos, aron dili sab mamroblema ang kunsumidor.
"Ayaw namo sige balik-balik sa among sesyon. Hinaot wala namo problema diha sa Moresco II kay sige gyod og brown-ut," sa iyang bahin sab ni Bise Gobernador Jigjag Pelaez, kinsa maoy nitapos sa halos usa ka oras kapin nga pagisa sa board member sa mga personahe sa Moresco Dos.
Dugang ni Pelaez nga andam mosuporta ang Sangguniang Panlalawigan kon adunay problema ug isango lamang kanila.