GI-AGHAT sa tinugyanan sa City Museum ang tanang katawhan nga mobisita diha sa museum ilabi na karong bulana nga kapistahan na sa dakbayan sa Cagayan de Oro.
Liboan usab ang bisita nga nakasuroy na sa museum karong tuiga diin kasagaran usab niini mga estudyante.
Sa pakighinabi ngadto kay Jesus Christopher Salon, officer-in-charge sa City Museum, nga ubay-ubay na usab ang mga nakalaag ilabi na nga duol kini sa parke.
"Naa poy significant number since ang location sa museum is strategic kay park kasagaran mohapit diri mga tourist nga mo stop-over to get to know the place. Naa poy mga LGUs and other municipalities," matud ni Salon.
Giingong sagad sa mga batan-on mas interesado sa third floor, diin anaa ang hulagway sa karaan pa nga hitsura sa siyudad ilabi na sa tuig 90s.
Gi-aghat niini ang tanan nga mobisita sa maong dapit aron usab makita ug masayran ang history sa dakbayan.
"Sa mga higala nato og makahigayon ta karong bulana, makahapit kita sa atong museum, makalantaw kita sa kasaysayn sa atong dakbayan. Hinaot ma-appreciate nato ang atong history and heritage," pag-aghat ni Salon.
Giingong daghan pa usab silay ipang-dugang nga impormasiyon sulod sa museum, apan daghan ka nang masayran kung mobisita sa maong dapit sama nalang kung diin ug kanus-a namugna ang siyudad.