NAHIMONG highlight sa 2019 3rd Quarter Joint Bureau of Local Government Finance (BLGF) Regional Association of Treasurers and Assessors (RegATA) conference ang paghatag og pasidungog ngadto sa mga probinsya nga epektibo kon hisgotan ang koleksyon sa ginsakupan.
Sila ni Engr. Marilyn Legaspi, kinsa provincial assessor, ug Ronald Jame Violon, ang provincial treasurer, isip mga representante ni Misamis Oriental Governor Bambi Emano, ang midawat sa plaques of recognition isip Top 2 ang Misamis Oriental sa Provincial Category sa Regional Top Ranking LGUs on Local Collection Efficiency for 2017 sa tibuok Northern Mindanao.
Ang lalawigan sa Misamis Oriental adunay total LGU collection alang sa 2017 nga mokabat sa P566,671,724.72 ug Collection Efficiency nga 124 percent.
"The momentum keeps going," matud ni Emano.
Mokabat sa 200 ka mga delegado gikan sa city, municipal, ug provincial treasurers ug assessors sa tibuok Northern Mindanao ang mitambong, kon asa ang probinsya sa Bukidnon maoy top 1.
Sa lima ka probinsiya sa tibuok rehiyon, ang top 3 ang gihataga'g pasidungog, kung diin ikaduha ang Misamis Oriental sa Bukidnon, samtang ikatulo ang Camiguin.
Sa siyudad, nag-Top 1 ang El Salvador City, misunod ang Malaybalay ug Ozamis, samtang sa Top 10 Municipal Level naangkon ang ikaunom nga pwesto sa lungsod sa Lugait, ika-pito ang Opol, ika-walo ang Laguindingan, ug ang Villanueva maoy 10th placer.