LIMA ka mga sekyu ang gidisarmahan sa gitouhang sakop sa New People's Army (NPA) kagahapon mga alas 6:30 sa buntag, Agusto 19, sa Quezon Heights, lungsod sa Balingasag, Misamis Oriental.
Sa inisyal nga imbestigayon, nasuta nga ang mga sekyu sa Minergy padulong unta sa quarry site aron magduty sa outpost dihang ang grupo sa mga walhong NPA ang naghasi kanila ug gipangkuha ang ilang mga armas.
Si 58th Infantry Battalion Commander Lieutenant Colonel Roy Derilo niingon nga harassment ang gihimo sa mga walhong grupo ngadto sa mga sibilyan.
"Wala sila naglampos ug ang kining nahitabo nga nadis-armahan nga ilang gipahibalo sa NPA nga successful, wala may successful niini," matud ni Derilo.
Gipasabot niini nga wala nasabtan sa walhong grupo nga walay nagdepensa sa lugar tungod kay dili kini compound sa mga sundalo.
Ang ilang giatake mga sibilyan ug walay direktang kalambigitan sa insurhensya ug yano lamang nga mga sekyu sakop sa sibilyan, gawas pa nga ilang gipangkuha nga armas gipanag-iyahan sa sibilyan.
Dugang ni Derilo nga klaro kaayong kasupakan sa Republic Act 9851, kon International Humanitarian Law, ang nahimo sa grupo ug angayan silang pasakaan og kaso.
Gibutyag sab ni Derilo nga giharas sab sa walhong grupo ilang bag-ong patrol base sa Sitio Dugo-Dugo Pelaez lungsod sa Claveria apan walay sundalo nga nasamdan ug napasakitan.
Sa iyang bahin ni Nicolas Marino, tigpamaba sa NPA Misamis Oriental, gibutyag niini nga walo ka armas ilang nasakmit.
"Gikalipay og dako ang aksyon sa NPA sa pagdisarma sa mga gwardya sa Minergy coal fired power plant nga usa ka minerhiyang korporasyon. Sa among imbestigasyon mokabat sa kinintos metros ang maapektuhan nga katawhan sa planta nga gitukod," pamugos ni Marino nga gihimo kini aron pagprotektar sa kinaiyahan ug katawhan.