PATAY ang usa ka lalaki human sa panagbangga niadtong Agusto 18 mga alas 9:15 sa buntag diha sa Bayabas Diversion road ning siyudad sa Cagayan de Oro.
Ang maong biktima naila nga si Alfarak Andi nga taga Barangay Kauswagan kinsa sakay sa motorsiklo nga Suzuki Smash nga nagdala sa numero sa plaka nga KA93130, samtang ang drayber sa trailer truck naila nga si Rhiel John Salon, 28, ulitawo nga taga Barangay Lapasan.
Sa nahipos nga impormasiyon gikan sa kapulisan sa Police Station 4 (PS4) sa Carmen, nga samtang gibaybay sa trailer truck ang dalan diha sa coastal road paingon sa kasadpang bahin, aksidente kining nagbangga sa motorsiklo nga gimaneho ni Andi, kinsa anaa sa susamang dalan apan paingon kini sa silangang bahin.
Nakaangkon og grabe nga samad ang biktima nga niresulta sa hinanaling kamatayon. Gidala pa sa rescuers sa Northern Mindanao Medical Center (NMMC) and biktima apan walay swerteng patay na sa dihang nadala sa ospital.
Boluntaryo usab nga mitahan ang drayber sa trailer truck sa buhatan sa kapulisan.
Sa pagsulat niini nga balita, kasamtangang anaa sa kustodiya sa kapulisan ang drayber, kinsa posibleng maoy mag-abaga sa galastuhon human sa panagtagbo sa mga pamilya sa biktima.