MIDEKLARA na og giyera batok sa dengue ang Task Force Kontra Dengue gumikan sa nagkataas nga ihap sa kaso sa dengue sa siyudad sa Cagayan de Oro.
Nasayran nga anaa na sa 1,975 ka mga kaso sa dengue ang natala ug anaa nay 15 ang patay tungod sa dengue kumpara niadtong nilabay nga tuig nga anaa lamang sa pito sa susama nga bulan gikan sa Enero hangtod Agusto 15.
Gibutyag ni Dr. Ramon Nery, chief sa J.R Borja General Hospital (JRBGH), nga ang dengue dili gapamili kung sapian o kwartahan ilabi na karong panahona taas ang ihap diha sa mga subdivision.
Giingong angayan na nga mabalaka ang katawhan ug magtinabangay aron wala nay mga mataptan ug mamatay pa niini nga sakit.
"Were having mortalities now dapat ang community makulbaan ani, we have an ongoing war against dengue so we have to fight it," matud ni Nery.
Karong adlawa mga alas 4:00 sa hapon, gitakdang ipahigayon ang city-wide clean-up drive sa siyudad.
Samtang sa laing bahin, gipahigayon usab niadtong Agusto 19 ang opening ceremony sa ika 56th Founding Anniversary sa JRBGH diin dunay mga nagkadaiyang kalihokan sama sa blood-letting, Miss JRBGH ug uban pa.