DRUGAS nga gikan sa Sugbo nga mobalor og P6.8 million nasakmit sa mga sakop sa Philippine Drug Enforcement Agency Negros Oriental inabagan sa kapulisan sa probinsya, Philippine Coast Guard ug Philippine Ports Authority (PPA) sa pantalan sa Sibulan alas 4 sa Lunes sa hapon, Agusto 19.
Nasikop usab ang ilang target lakip na ang duha ka mga tinun-an ug usa ka call center agent.
Ang mga nasikop giila nga silang Tim Bernard Las Piñas, 25, subject sa operation; Ellery Jude Alabanzas, 23, estudyante; Kathleen Caryl Tulabing, 23, estudyante; ug Lehsa Jan Taganile, 23, call center agent.
Atol sa operation, nakuha ang usa ka dakong putos nga motimbang og usa ka kilo nga mobalor ang tanan og P6,800,000, cash nga moabot og P4,000; cellular phone, sling bag ug ang puwa nga sakyanan nga ilang gigamit sa pagbiyahe sa drugas paingun sa Dumaguete City.
Matod ni Leia Alcantara, information officer sa PDEA 7, nga giila nga high value target si Las Piñas ug usa kini ka high impact operation sa ilang buhatan.
Taod-taod na nila nga namonitor si Las Piñas ug sa dihang ilang nakuha ang cellphone niini, ni-transact dayon sila nga mopalit og usa ka gramo nga shabu.
Sa dihang mipahibawo kini nga mokuha una og supply sa drugas sa Sugbo, ila na dayon nga gipabantayan sa ilang mga ahenta.
Pagka Lunes, ni-text na ang target nga mopadulong na sila sa Dumaguete City agi sa pantalan sa Sibulan.
Nakig-alayon dayon ang PDEA Negros Oriental sa PCG ug PPA.
Gihatag ang tanang mga impormasyon sa suspek lakip na ang sakyanan niini.
Hangtod nga nisakay na kini sa usa ka barge nga mopaingun sa pantalan sa Sibulan.
Gipaabot nga maka abot kini sa maong pantalan ug nahitabo ang buy bust operation nga miresulta sa pagkasikop sa upat.
Gisunod dayon ang pagsusi sa sulod sa sakyanan ug nakuha ang uban pa nga mga butang nga motimbang usa ka kilo nga gituohang shabu.
“Gikan sa Cebu ang iyang supply sa drugs. Ang nahitabo ani ang atong team ang iyang gika transact. Nya ang ingon niya nga moari sa siyag Cebu kay mag kuha siyag item. Nya nag kontakay sila nga padung na daw siyag Dumaguete agi sa Sibulan,” asoy ni Alcantara.
Adunay mga impormasyon nga gitug-an si Las Piñas apan wa lang una ipahibawo sa PDEA kon kinsa tungod kay mohimo pa silag follow up operation.