ANG pagsaka sa presensya sa tubig-dagat sa mga atabay, maoy rason nga mi us-os ang supply sa Metropolitan Cebu Water District (MCWD) ngadto sa mga konsumidor niini sa Metro Cebu.
Mismo ang Superbalita Cebu Facebook Page, nakadawat og nagkadaiyang reklamo nga nagnihit ang ilang supply sa tubig.
Bisan pa man sa forecast sa Pagasa nga mas daghang uwan ang masinati karon, apan nakasinati og kanihit na usab sa tubig ang MCWD.
Gibutyag sa MCWD nga sud sa duha ka semana, niabot na sa 13,000 cubic meters matag adlaw sa tubig ang nikunhod ang supply tungod sa pagkunhod usab sa magamit nila nga tubig resulta sa saltwater intrusion.
Nasayran usab nga adunay usa ka pribado nga supplier ang maong water utility sa lungsod sa Consolacion ang gi-shutdown tungod sa taas nga presensya sa chloride.
Base sa Philippine National Standards for drinking water, anaa lang sa 250 milligrams per liter ang kalidad sa tubig nga mainom ug ma apod apood ngadto sa sa publiko.
“Rising chloride levels indicate saltwater intrusion in groundwater wells, which comprises majority of MCWD’s water sources. MCWD and the supplier tried various ways to treat the water for several weeks but decided to stop its operations since it will place other nearby wells at risk of seawater intrusion if pumping is continued,” tipik sa press release sa MCWD.
Dugang niini nga ang pag-shutdown sa private supplier sa Consolacion, niresulta sa pagkawala sa 7,000 cu.m./day nga supply diin naapektohan ang mga konsumidor sa lungsod sa Consolacion ug dakbayan sa Mandaue.
Dili kini ang unang higayon nga gi-shutdown sa MCWD ang usa ka atabay tungod sa saltwater intrusion.
Gani anaa lang sa 40 porsento ang gikuha sa MCWD gikan sa groundwater sa Metro Cebu, 60 porsento iini anaa sa mga private well owners.
Nawagtangan usab og 3,000 cu.m./day sa supply ang MCWD tungod sa pag-ubos usab sa masupply sa Cebu Manila Water Development (CMWD) Inc., plant sa Carmen.
“CMWD, a private bulk water supplier, is delivering 35,000 cu. m. of water to MCWD that is being supplied to its consumers in Compostela, Liloan, Consolacion, parts of Mandaue and the whole Mactan island. The decrease is affecting the water services of MCWD’s consumers in these areas,” kabahin sa press statement.
Ni-ubos usab sa 3,000 cu.m./day ang water production sa mga tabay sa MCWD sa Talamban diin apektado ang Barangay Banilad, Luz, parte sa Lahug, Camputhaw, ug ang Apas.
Matod sa MCWD tungod kini sa over-extraction sa groundwater sa dapit.
Gihimo na karon sa MCWD ang supply rotation aron mabalanse ang supply sa tubig.
Ni-abiso usab ang MCWD sa ilang konsumidor nga magpundo kini og tubig sa dili peak hours susama sa 10:00 sa gabii ngadto sa 5:00 sa kaadlawon.