Cesar Albor

Sandiganan

KON moduaw na gani ang mga adlaw sa kwaresma, magping-it sa kalisod ang mga kaigsuonan nato sa kabukiran. Walay maayong ani kay mokulkol man ang mga tanom gumikan sa makapagba nga huyad sa kainit. Apan alang sa mga driver, ting-ulan man o ting-init kanunay ang kwaresma sa ilang panginabuhi.

Ang gamay nilang kinitaan tukbon lang kanunay sa mga CITOM nga nagnganga sa kadalanan nga nagpangita sa ilang kalapasan.

* * *

Pait diay ang sitwasyon sa mga driver. Dihay taxi driver nga nagyawyaw sa hilom nga halos mga kadalanan sa kinapusoran sa siyudad “no stopping”. Kon mo pick-up silag pasahero kay mao may ilang tuyo, dakpon sila ug P1,200 ang penalty. Pun-an pa sa dakong penalty kon makahunat silag dagan sa “stop signal”.

Kini ang gisagubang nila nga kwaresma o kalbaryo sa ilang panginabuhi.

Tungod sa dagkong penalty, mapugos sila pagdudho og P200 ngadto sa mga traffic enforcer. Mao diay nga dunay isyu karon nga 48 ka mga sakop sa CITOM ang nagsagubang og imbestigasyon kay giingong nangilkil sa mga driver.

"The Manny Pacquiao Blog". Click here for stories and updates on the Filipino boxing champ.

ULAN SA TING-INIT

Tunog na kaayo ang hisgutanang pulitikanhon. Iyahay og pahumot sa ilang kandidatura, apan nakapabor ang dunay ikabuga nga kwarta.

Ang ipaulan nga salapi maoy motabon o masubhan ang init nga isyu nga gibato sa pulitiko. Kay ang kwarta maisip nga ulan sa ting-init nga madimdim niadtong gustong mobaligya sa ilang balaanong katungod.

TOMAS UG ANG SURPLUS

Dili nato ikatingala ang dakong surplus sa panudlanan sa siyudad sa Sugbo kay mao may pamahayag ni Mayor Tomas Osmeña. Apan daghan ang nahingangha nga wala man matagad ang kadalanan, tambal sa hospital, ug uban pang batakang serbisyo. Nunot niini, mitumaw ang pangutana, kanus-a man mahitabo nga dunay surplus samtang naglimin pa sa dakong utang sa SRP. Morag giangkon ni Mayor Osmeña ang SRP. Susama man ang mayor sa pamilyang Aquino nga sila kunohay tag-iya sa kadaugan sa Edsa I People Power Revolution.

Dili ba kadaugan kadto sa katawhang Pilipinhon gikan nga nagduhiraw tupad sa gihaya nga demokrasya sa nasod?

SAMA RAG PULITIKA

Daw pulitika sab kining paugnat sa kusog. Kay taliabot man ang sangka nila ni Pacquiao ug Clottey sa “The Event”, nag alintabo ang ilang tinguha pag-angkon og kadaugan. Daghang nangagpas nga modaog si Pacquiao sa boksing apan dunay mitagna nga mapilde sa pagka-kongresista. Pastilan baya, mora gyud sila og propeta bisan wala makaeskuyla pagka-manalagna.

SALAMAT

Sa nadawat natong e-mail, nadasig sa pagbasa sa namantala natong kolum sila si Dodo Piczon sa San Jose California ug ni Tonton sa Vancouver, Canada. Salamat ninyo ha…

(csa_1156@yahoo.com cell #: 0905-250-4643)