Wa damha kadaugan

SILA Arlan Arbois, Jr. sa Team Aura/Rizal Memorial Colleges (RMC) ug Diana Mae Memoracion sa Emar Human and Environmental College milangkat sa titulo sa 21K sa bag-uhay pa lamang nahuman nga JCI Kadayawan Half-Marathon 2019 nga gihimo pagawas ug pabalik sa People’s Park sa Davao City.

Si Arbois mioras og usa ka oras, 14 minutos ug upat ka segundos.

Gipildi niya sila Agustin Ychon sa Team Aura/Spectrum ug Reymark Sorianosos sa Kidapawan City aron makuha ang titulo sa men’s 21K.

Si Arbois wa magdahum nga manguna sa 21K diin bag-uhay lamang siya nakiglumba, ug nahimo siyang ikaduha sa 25K event sa Kadayawan Run 2019 usa ka semana ang nakalabay.

“Bun-og pako sa 25K, nakaloy-an pud. Ang akoa lang ato nga mahuman lang nako ang 21K den mao to nadugay nakong dagan na conditionan na noon ko,” suma niya.

Si Ychon mioras og 1:14:39 samtang si Sorianosos mireshistro o 1:20:00 aron mahuman sa ikaduha ug ikatulong pwesto.

Ang 21-anyos nga si Memoracion, miangkon sab sa women’s 21K crown, mihuman sa lumba sa oras nga 1:54:01 kontra Madilyn Carter (1:54:03) ug Rosalyn Agatia (2:02:17).

Nakurat sab siya sa iyang kadaugan sa 21K diin sagad siyang manguna sa 5K ug 10K fun runs.

Niya sa SunStar Davao, “Gusto lang nako mo try maam kung makaya ba nako mag 21K den wla ko nag-expect na kaya diay nako maam.”

Ang Bimp-Eaga Friendship Games medalist ug Carter dikit kaayo og biya sa may Department of Education (Deped) along Quirino Avenue apan si Memoracion misutoy dihang duol na siya sa finish line sa People’s Park.

Sa 10K, si University of Mindanao’s Fritz Lantaco nanguna sa men’s event. Nahuman niya kini sa oras nga 35:24 samtang si Daryl Mark Daban sa Team Aura (37:58) nabutang sa ikaduha ug Dante Ba-ay sa South Cotabato (38:26) sa ikatulo.

Sa women’s 10K nakuha ang titulo ni Darie Mae Daban sa Team Aura (1:02:02), gipildi sab niya sila Rachel Rellin (1:04:31) ug Gianne Mendoza (1:04:45).

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph