NANGAANOL ang duha sa ka mga sinaligan sa Gilas Pilipinas nga sila si Matthew Wright ug Poy Erram atol sa praktis sa national training pool niadtong Lunes sa gabii, Agusto 19 sa Meralco gym.
Si Wright nakasinati og angol sa iyang tuo nga tiil ug wala na kini nakaapil sa 5-on-5 scrimmages samtang si Erram nakasanati og angol sa iya sab tuo nga tiil dihang wala kini nakatugpa og insakto atol sa usa ka rebounding play.
Hinuon nagkanayon si Erram nga dili ra grabe ang iyang pagkaangol ug sama ni Wright, malaumon siyang makaduwa ra og balik sa umaabot nga pipila ka mga adlaw.
Ang Gilas hugot nga nangandam alang sa ilang kampanya sa FIBA Basketball World Cup nga sugdan karong Agusto 31 sa China.
“Ah, natapilok lang. Medyo ano eh, masakit, pero ayun, kaya naman,” matod ni Erram sa interbyu sa Spin.ph.
“Hindi siya tulad ng iba na high ankle na injury. So nothing serious naman. Ayun, titingnan pa, iche-check pa bukas kung ano pwede
gawin.” Kagahapon nakatakdang ipaubos sa MRI ang duha ka mga magduduwa apan ning pagsuwat, wala pa masayri ang resulta.
“Hopefully I won’t miss a lot but definitely, I had to sit out today. It was pretty painful so I need to get it checked out,” pasabot ni Wright, kinsa maoy tirador sa gawas sa Phoenix Pulse Fuel Masters.
Si Gilas coach Yeng Guiao nagkanayon nga mas nabalaka siya sa angol ni Wright kumpara sa nasinati ni Erram.
“Sana naman okay siya. Si Poy is just a regular sprain, so si Poy siguro hindi naman magkaka-problema. ‘Yung kay Matthew ang medyo worried ako,” pag-angkon ni Guiao.
Sa laing bahin, wala gihapon nakaapil ang pambatong sentro sa San Miguel Beermen nga si JuneMar Fajardo lakip na ang mga sinaligan sa Talk N’ Text KaTropa nga sila si Roger Pogoy ug Troy Rosario.
Ang tulo pulos gikan sa Philippine Basketball Association (PBA) Commissioner’s Cup finals series diin gilupig sa Beermen ang KaTropa, 4-2.
Hinuon bisan pa niini, matod ni Guiao nga kuntento ra siya sa kalambuan sa ilang preparasyon ug malaumon siyang dali ra’ng makaapas sila si Fajardo, Pogoy ug Rosario sa pagkat-on sa ilang gipraktisan.
“We’re doing well, really. Actually some of you guys are witness to our practices. We’re moving a lot better now, we’re getting the chemistry, the cohesion. The Spain camp was good for us,” matod ni Guiao.
Ang ubang mga sakop sa training pool mao sila si Japeth Aguilar, Mark Barroca, CJ Perez, Andray Blatche, Robert Bolick, Beau Belga, Gabe Norwood, Kiefer Ravena, Paul Lee ug Raymond Almazan. (ESL)