ANG kaminyuon, sama sa panultihon sa uban, di sayon, nanginahanglan sa pagsakripisyo.
Ang kaminyuon, di lamang puros katam-is sa panag-uban, anaa ang kalisud, apan nagpabilin ang pagminahalay, nga gilig-on sa pagsalig sa Kahitas-an,
pagpasensiya ug pagminahalay.
Sa atong panahon, di na kaayo ta kakita og kaminyuon nga molungtad og 50 ka tuig, apan kini di imposible, inubanan sa dakong pagsalig sa kahitas-an, pag-ampo, gasa.
Sila Bernard ug Rebecca Laureano malipayong nagsaulog sa ilang ika-50 nga anibersaryo sa kasal, uban ang pamilya ug suod nga mga higala, Dominggo, Agosto 11, 2019 sa Hilltop View, D’Leonor Inland Resort, Forestal Road, Buhangin, Davao City.
Usa ka ispesyal nga tigum ug pagsaksi sa tim-os nga pagminahalay sa magtiayon ang nasud-ong sa ilang mga kabanay, anak, higala nga nakapaniid sa ilang istorya sa pagminahalay.
Ang kinamaguwang anak nga babaye, Sarah Jane Laureano-Castledine, mibiyahe pauli dinhi uban ang anak nga si Bien Bernard.
Samtang ang kinamanghurang anak-lalaki, Randi Goldwyn milupad gikan Canada aron makauban ang ubang igsuong sila Ray Aceyork, Redelmar, Adelle Grace, Roy Francis ug Catherine Ann sa paghatag og tribute sa bugti nga pagminahalay sa ilang ginikanan.
Anaa sab ang 12 ka apo ug upat ka children-in-law.
Si Bernard, anak sa usa ka mag-uuma gikan Davao Oriental nakigminyo kang Rebecca, anak sa usa ka nangandoy mag-pulitiko gikan sa angkan sa Morales sa Davao City niadtong Agosto 13, 1969.
Si Bernard kanhi former government employee nga nagsilbi sa Davao City Agriculture office, samtang si Rebecca daghan og gisuwayang trabaho, sama sa maniniyot ug beauty stylist.