MOPASUNDAYAG si Apl.de.ap sa opening ug closing ceremonies sa 30th Southeast Asian Games nga ipahigayon sa Pilipinas sa ulahing bahin ning tuiga.
Ang bantugang Fil-Am artist mipirma og kontrata kagahapon sa House of Representatives kauban si House Speaker ug Philippine SEA Games Organizing Committee (Phisgoc) chairman Alan Peter Cayetano.
Si Apl.de.ap, kansang tinuod nga pangalan mao si Allan Pineda Lindo, misikat sa tibuok kalibutan isip usa ka miyembro sa Grammy Award-winning hip-hop group Black Eyed Peas.
Mopasundayag siya sa opening program karong Nobiyembre 30 sa Philippine Arena sa Bulacan.
Mopasundayag na sab si Apl.de.ap sa closing program karong Disyembre 11 sa New Clark City athletics stadium ug ning higayuna, kauban na niya ang kompletong mga sakop sa Black Eyed Peas.
Nagkanayon si Apl.de.ap nga naghinamhinam siya nga mahimong parti sa SEA Games hilabi na kay natawo siya sa Barangay Sapang Bato sa Angeles City, Pampanga nga duol ra kaayo sa Clark, usa sa main hubs sa matag duha ka mga tuig nga kompetisyon.
“I’m from Angeles City, Pampanga and I won’t miss it for the world,” matod ni Apl.de.ap sa interbyu sa Spin.ph.
“I want to be part of this historic moment. I’m really proud of my country and I really want to share my talent and what I can provide for this event. I’m very excited to perform and rock the stage in the opening and the closing ceremony.”
Asoy ni Cayetano nga ilahang paninguhaon nga ang pag-host sa Pilipinas sa SEA Games mahimong labing dakong edisyon sa kompetisyon. (ESL)