MOTUO ba mo nga si Pangulong Rodrigo Duterte midawat og dul-an P200 milyones isip regalo sa iyang adlaw nga natawhan niadtong 2014?
Kung ang Dabawenyo ang pasultihon, di gyud katuohan ang maong alegasyon. Apan, kung ang Vera Files ang pasultihon, aw, tinuod nga midawat ang Pangulo samtang mayor pa siya dinhi sa Davao.
Suma ni Ellen Torsedillas sa Vera Files sa gipagawas nga report sa ilang website Martes nga mikabat sa P193,705,615.88 ang gideposito sa joint account ni Duterte ug iyang anak, Mayor Sara Duterte-Carpio.
Kini natala sa iyang ika-69 nga adlaw nga natawhan niadtong Marso 28, 2014.
Kung mangutana kita kung asa gikan kini nga rekord, aw, posible nga gikan kini sa mga bank accounts nga gipagawas kaniadto ni kanhi Senador Antonio Trillanes IV.
Busa, gihagit karon sa Malakanyang si Tordesillas nga pamatud-an ang iyang alegasyon.
“It’s not true. Does [Vera Files] have any evidence to that effect? Ang dami nang nag-sabi na si Presidente. Hindi ba ilang daang milyong meron siya, pero hindi naman totoo,” pahayag ni Presidential Spokesperson Salvador Panelo.
Ang report sa Vera Files migawas human namulong ang Pangulo nga di niya silotan ang mga pulis nga modawat og regalo sa mga tawo nga nalipay sa ilang trabaho.
Giingon ni Panelo nga di batasan sa Pangulo nga modawat og personal nga regalo. Busa, walay kamatuoran ang alegasyon
sa Vera Files.
Ambot lang kaha sa ubang politiko? Basin sila pa ang mangayo sa negusyante o kontraktor nga dunay transaksyon sa gobyerno?
Bitaw, basta maghisgut na gani og birthday gift, mahinumdom ko sa sikat nga politiko sa Davao Region nga halos usa ka semana iyang birthday party nga gitambongan sa dagkong kontraktor sa tibuok nasud nga gidudahan nga mihatag niya og regalo.
++++
Akong ipadangat ang pahasubo sa mga higala ug pamilya kanhi ni Environment Secretary Gina Lopez, kinsa mibiya na dinhi sa kalibutan sa edad 65.
Usa ko sa mga nakadayeg sa iyang katakus ug adbokasiya sa pagpanalipod sa atong kinaiyahan.